Minister-in Jeremy a lawmpui

Sports & Youth Services minister Lalnghinglova Hmar chuan nimin khan a pisaah Indian Weightlifting Federation (IWLF) National Weightlifting Championship 2023-2024 gold medalist Jeremy Lalrinnunga lawmpuina a hlan.

SYS Minister chuan, national level-a champion nih a harsa a, thawhrimna leh tumruhna nen chauha thlen theih a nih thu sawiin, "Sports hi quota tel miah loa Mizote’n India rama a ber kan nih theihna langsar a ni," a ti a; sports category hrang hranga result ṭha lehzual nei turin infiammite chawikan leh pawlte thuam chak kawngah hmalak a nih tur thu a sawi.

Jeremy Lalrinnunga pawhin thu sawiin, inhliam vangin a duh anga a inbuatsaih ṭha thei lo chunga gold medal a la chu lawmawm a tih zual thu a sawi a, "Ka inhliam chhung zawnga min fuih a, min tiphûr ṭhintu Mizoram Weightlifting Association hruaitute chungah lawmthu ka sawi a ni," tiin, a kal zelna turah Mizoram sorkar, pawl hruaitute leh mipui ṭanpuina a ngen.

IWLF buatsaih National Weightlifting Championship 2023-2024 hi December 28, 2023-ah ṭan a ni a, January 8, 2024 thleng a awh dawn. Jeremy-a hian kg. 67 category-ah gold medal a la a ni.