Aikal la hriattir hun a tàwp hnai

Mizoram sorkar chuan sorkar department tin hotute chu an department hnuaia thawk zinga aikal late leh an lâk chhante January 5, 2024 ral hmaa ziaka thehlut tur leh a soft copy thehlut vek turin a hriattir a; hun tiam a pek hi naktukah a tàwp dawn.

Department of Personnel and Administrative Reforms (DPAR) chuan December 29, 2023 khan hriattirna tichhuakin, sorkar hnathawkin aikal an lâk chu Central Civil Services (Conduct) Rules, 1964 bawhchhiatna leh dan kalh a nih avangin sorkarin a ngai thutak hle tih a tarlang.

DPAR chuan, sorkar department tin hnuaia sorkar hnathawk, an awmna hmun tur ni loa awm leh aikal late nihna kimchang leh an dinhmunte ziaka January 5, 2024 ral hmaa thehlut tur leh a soft copy thehlut vek turin department tin a hriattir a ni.

Aikal la, sorkar hriattirna anga ti lote chungah khauh taka hmalak a nih tur thu DPAR chuan a tarlang bawk a; hriattirna tihchhuahah hian form thil tel nghal a ni.