KHAWTHLIR

CBI consent pe

Central Bureau of Investigation (CBI)-in Mizoramah thil chhui ngaite an chhui theih nan Mizoram sorkar chuan hna thawh phalna a pe. Hemi chungchangah hian Mizoram Vigilance department chuan December 28, 2023 khan The Mizoram Gazette hmangin hriattirna a chhuah a; Delhi Police Establishment Act, 1946 Section-6 tlawhchhanin CBI mi leh sate'n Mizoramah an duh anga hna an thawh theih nan phalna (accords consent) pek a nih thu tarlan a ni.

Thisen pe

Youth Evangelical Front chuan December 27, 2023 khan Kohhran Thianghlim hmunpui, Solomona Temple-ah Civil Hospital, Aizawl tan thisen unit 202 an pe a, petute mipa 142 leh hmeichhia 60 an ni. PYD (NEI) Durtlang Bialin December 28 khan Synod Hospital tan thisen 11 an pe a; KṬP, Melriat Bial pawhin December 29 khan ZMC tan thisen unit 74 an pe a, petute mipa 64 leh hmeichhia 10 an ni.

Republic Day sawiho

Aizawl district bawrsap Nazuk Kumar hoin nimin khan sorkar hotute'n January 26, 2024-a Republic Day vawi 75-na lawm dan tur an sawiho a, chanvo leh mawhphurhna hrang hrang an insem. Kumin Republic Day lawmnaah hian school contingent leh armed contingent 25 vel bakah, ex-servicemen contingent leh band party pali tel tura beisei a ni.

CM Delhi-ah zin

Chief minister Lalduhoma chu sorkar thil pawimawhte ti turin nimin khan Delhi a pan. CM-in tun kar chhunga amah hmu duhte tana appointment siam tawhte leh meeting ṭhenkhat ruahman tawhte chu hun remchang hmasaa neih turin tihdanglam a nih thu sorkar thuchhuahin a tarlang.

Kum 100-na lawm

Mawhrei khua kum 100 tlin lawmna March 2023-a ṭan chu nimin khan Mawhrei ECM kohhran biak-inah khar a ni a, tlaiah khawtlang huapin centerary ruai an ṭheh. Mawhrei khua hi Siaha district-a awm niin, kum 1923 khan an khaw lal Vahai Chozah leh mi 15 velin an din a, chenna in 130 vel a awm mek a ni.

Calendar hralh mek

Information & Public Relations department siam Mizoram Calendar 2024 leh Mizoram Diary 2024 chu nimin khan mipui lei theihin IPR Directorate-ah zawrh ṭan a ni a, calendar lei tum mi ṭhahnem tak an awm a, thui tak an intlar. Calendar leh diary hi chawhma dar 10 aṭanga tlai dar 3 thleng hralh a ni a; calendar man Rs 70, diary man a lian Rs 180 leh a tê Rs 140 a ni.