AMC 2023-24 budget revised estimate cheng nuai 11,731.81 pawm a ni

Kum 2023-24 fi nancial year chhunga Aizawl Municipal Corporation (AMC) budget chu cheng nuai 11,731.81 a ni ta a; budget zinga 81% chu khawpui tihhmasawnna atan hman a ni dawn.

Aizawl mayor Lalrinenga Sailo kaihhruaiin December 28, 2023 khan AMCBoard of Corporators (BoC) chu an ṭhukhawm a; executive corporator (Cash & Accounts) Lalringliana'n AMC budget revised estimate cheng nuai 11,731.81 a pharh. AMC 2023- 24 budget estimate chu cheng nuai 11,479 a nih thu te, RE chu BE aiin cheng nuai 252-in a tam zawk thu a sawi.

AMC budget RE-ah hian mipuite'n awlsam zawka online hmanga Property Tax an pek theihna tur Property Tax Management Software (PTMS) peih a nih thu leh hei mipui tan chhiah pek a awlsam sawt beisei a nih thute tarlan a ni. AMC budget revised estimate 2023-24 ah hian budget aṭanga 81% chu khawpui hmasawnna hrang hrang thawhna atan hman a ni tih tarlan a ni a; 18.8% chu AMC inrêlbàwlna - thawktute leh corporator-te hlawh leh hamṭhatna leh inrêlbàwlna atan te, local council lawmman atante hman a nih thu tarlan a ni bawk.

AMC sum hmanna lian zual tarlante chu - Aizawl khawpui bawlhhlawh lak khawmna atan te, tui leh a kaihhnawih atan te, corporator ward development fund atan te, LC kaltlanga veng chhung hmasawnna atana te, street light chhit mante a ni a; kumin 2024-a Aizawl Day hmanna tur sum dah a nih thu tarlan tel a ni.

AMC hi mahni intodelh tur a nih avangin central leh state sorkar suma innghat mai loa chhiah leh thil dang a lak khawm hmanga intodelh tura tih a nih thu AMC hotute chuan an sawi.

Financial year kal meka sum thawh chhuah chu kum dang aia a tam thu leh cheng nuai 1001 a nih thu an sawi bawk. Financial year 2023-24 chhungin sorkar laipui aṭangin cheng nuai 6,564 dawn beisei a ni a, state sorkar aṭangin cheng nuai 2,324 dawn beisei a ni.