Covid-19 positive-te Nihna kimchang puanzar Sorkarin a phal tawh
Mizoram sorkar chuan, Covid-19 hripui donaah chak zawka hmalak a nih theih nan Covid-19 veite nihna kimchang - hming, nu/pa hming, kum zat, khua/veng leh house number-te puanzar phal a nih thu nimin khan a puang.
Health & Family Welfare department secretary H Lalengmawia'n nimina hriattirna (notification) a chhuah danin, The Mizoram (Containment & Prevention of Covid-19) Ordinance, 2020 Section 4(10)(a) tlawhchhanin Covid-19 veite nihna kimchang puanzar phal a ni tawh.
Notification chuan, "An awmna district-a DC emaw, an bialtu chief medical officer ten puanzar phalna an pe thei ang a, anmahni ngeiin an puangzar thei bawk ang," a ti. He hriattirna hi thuchhuah ni aṭanga hman nghal tur a ni a, hei vang hian Covid-19 veiin a duh chuan hripui a vei tih amah ngei a inpuang thei tawh a, hnu chhui a chak zawk theihna turin DC-in emaw an bialtu CMO-in emaw a puangzar thei bawk ang.