CM Duhoma'n PM Modi a kâwm; Myanmar ráltlân chungchang a sawipui

Chief minister Lalduhoma chuan nimin khan prime minister Narendra Modi chu a chenna inah a kâwm a, Myanmar aṭanga Mizorama ráltlante chu ṭha taka lo tuamhlâwm an duh thu a sawi. CM hian nimin vêk khan Union Road Transport & Highways minister Nitin Gadkari a kàwm a, January 3, Nilaini khan External Affairs minister Dr S Jaishankar nen an inkàwm bawk.

Sorkar thuchhuah tarlan danin, CM Lalduhoma hian Myanmar ráltlânte chungchang PM Narendra Modi hnenah a thlen a, "India leh Burma ramri tuna kan hman mek hi a nghawng tur mipui ráwn loa British sorkarin a siam a ni a, keini Mizote tan chuan barh luih ramri, kan ram leh hnam min ṭhen darhtu a ni a, chuvang chuan vawiin thlengin pawm harsa kan ti em em a, rorelna pakhat hnuaia awm hi kan duh ber zawk a ni," a ti.

Lalduhoma chuan, "Myanmar aṭanga ráltlana lo chhukte hi kan tan hnam hrang an ni lo a, kan unau, kan thisen zawmpuite an ni a, chuvangin, ṭha tak leh duat taka lo tuamhlâwm kan duh," a ti a; Akhand Bharat (Greater India) project kalpui rualin Greater Mizoram pawh kalpui ve an duh hle thu Prime Minister a hrilh.

Chief Minister chuan, Inner Line Permit (ILP) chu tuna kalpui mek dan aia ṭha zawk leh mumal zawk a awm thei nia a hriat thu a sawi a; Mizoram dinhmun leh hmathlir pawimawh dangte a thlen a ni.

Narendra Modi chuan, CM Lalduhoma chu duhsakna hlànin, inhmuh fo a duh tur thu a lo hrilh a, Mizoram hmasawn zelna atan kawng engkimah inhawng taka an thawhpui tur thu a sawi. ILP chungchangah ruahmanna siama a hnena thlen turin a lo chah bawk.

Tun ṭum hi CM Lalduhoma'n chief minister a nih hnua Prime Minister leh sorkar laipuia minister dangte an hmuna a hmuh leh kawm vawi khatna a ni a; nimina PM Narendra Modi leh Nitin Gadkari a hmuhnaah hian chief secretary Dr Renu Sharma, Delhi Mizoram House resident commissioner Garima Gupta leh additional resident commissioner Alex Chawngthuten an ṭawiawm a ni.