Tourism Minister hlui thubuai titàwp

Lokayukta chuan Khawzawl Tourist Lodge sakna sum tichingpena Tourism minister hlui John Rotluangliana puhna thubuai a titawp a, 'Sorkar sum tihchingpen a ni lo' tiin Chief Secretary/Chief Vigilance Officer hnenah thubuai tihtawpna lehkha a thehlut.

Khawzawl Tourist Lodge sak chungchangah sum hman dan felhlel a awm nia ngaiin John Rotluangliana leh khatih laia Tourism director Biakthanmawia lakah Lokayukta-ah thubuai thehluh a ni a, ACB-in an chhui a ni.

ACB hian 'Sorkar sum tihchingpen a awm lo' tiin Lokayuta-ah an chhuina report ṭum thum an thehlut a; Mizoram Lokayukta Act, 2014 Section 19(3)(c) hmanga hnu chhuina leh thuhretu hrang hrang aṭanga a hmuh danin sum hman sual emaw, sorkar sum tihchingpen a awm lo tiin thubuai hi Lokayukta chuan a titawp a ni.

Khawzawl Tourist Lodge sakna atan hian New Economic Development Programme (NEDP) hnuaiah cheng nuai 67.49 ruahman a ni a, NEC aṭangin Tourist Lodge sakna tur hmuh a nih leh si avangin cheng nuai 67.49 chu bill bá atan pek a ni.