CYMA hruaitute leh Excise Minister-in ruihhlo do chungchang an sawiho

Central YMA hruaitute chuan nimin khan Excise & Narcotics minister Lalnghinglova Hmar chu a pisaah an kâwm a, ruihhlo donaa hmalak dan tur an sawiho.

Excise Minister chuan, Mizoramah nasa zawka ruihhlo do a ngaih thu sawiin, "Ṭhalaite'n an thihpui nasa a, a la damate'n kan ṭahpui bawk. Ruih theih thil chi hrang hrang, a bikin heroin donaah chak zawka hmalak a ngai tak zet," a ti.

Central YMA leh mipui thlàwpna nena ṭanghoin hlawhtling taka ruihhlo do kalpui theih a beisei thu Lalnghinglova Hmar chuan a sawi bawk.

Central YMA hruaitute chuan, Excise Minister chu hma an lâk tawh dante an hrilh a, ruihhlo donaa an dinhmunte an sawifiah. Sorkar nena ṭangkawpin chak zawk leh zau zawka hma an lak zel theih dan tur sawiin, ruahmanna siam theih dan turte an thlen a ni.