2023-ah ruihhlo vangin mi 76 an thi; Ruihhlo vangin mi 1,812 an thi tawh

Mizoramah kum 2023 chhung khan ruihhlo vangin mi 76 an thi a, tun hnai kum 19 chhunga ruihhlo vanga thi an tam ber kum a ni a; Mizoramah ruihhlo vangin mi 1,812 an thi tawh.

Excise & Narcotics department (END) chhinchhiah danin, ruihhlo vanga kum 2023 chhunga thi mi 76-te chu mipa 64 leh hmeichhia 12 an ni. Ruihhlo vanga thite chu heroin leh ruihhlo dang tih pawlh vek an ni a, an ruih ṭhin ber chu heroin a ni.

END-in record a neih chinah kum 1984 khan ruihhlo vanga thi Mizoramah mi pakhat a awm a, kum 1989-ah ruihhlo vanga hmeichhe thi an awm ṭan. Ruihhlo vanga thi an tam ber kum - 2004 khan mi 143 an thi a, kum 2000-ah mi 139, kum 2001-ah mi 101 leh kum 2003-ah mi 136 an lo thi tawh bawk.

END record ang chuan, kum 1984 aṭanga kum 2023 thleng khan Mizoramah ruihhlo vangin mi 1,812 an thi a, mipa 1,593 leh hmeichhia 218 an ni.
Ruihhlo vanga thi zat hi kum 2004-ah 143 (a tam ber kum) a nih laiin, a kum leh 2005-ah chuan 42-ah a tla thla a, a hnuah pawh tlahniam zelin, kum ruk chhung chu mi 30 an tling lo vek a, kum 11 chhung chu mi 50 an tling lo bawk.

Hetih lai hian, Central YMA chuan kum 2004 aṭangin ruihhlo an do ṭan a, SRS dinin, SRS hmangin September 2008 thleng ruihhlo an do. Kum 2009-2010 chhung Flying Squad hmangin ruihhlo an do a, kum 2011 aṭanga August 2013 thleng Central Anti Drug Squad (CADS) hmangin ruihhlo an do leh bawk. April 15, 2015-ah SRS din thar niin, October 15, 2019-ah tihtawp a ni a; September 2022 aṭanga tun thlengin CADS hmangin ruihhlo an do leh mek bawk a ni.