State sorkarin two wheeler taxi permit 5,256 a pe chhuak tawh

State Transport Authority (STA) chuan December 13, 2023 thleng khan Mizoramah two wheeler taxi permit 5,256 an pe chhuak. Aizawl khawpui tana permit pek zat 3,646 aṭangin tlân (service) mek 3,264 a awm a, service lo 382 a awm.

RTI Act tlawhchhana zawhna Transport department SPIO-in a chhan danin, Aizawl tan bik kum 2016 aṭangin two wheeler taxi permit pek ṭan a ni a, December 2021 thleng pek a ni. Hemi chhung hian STA chuan Aizawl khawpui tan two wheeler taxi permit 3,646 a pe chhuak.

Hetih lai hian, Aizawl Traffic Police aṭanga thu dawn danin, December 2023 thleng khan Aizawl khawpuiah two wheeler taxi service lai 3,264 a awm a; pemit pek chhuah aia a tlem avangin permit 382 chu permit thi emaw, la service rih lo emaw tihna a ni.

September 6, 2023-a STA ṭhutkhawmah Aizawl khawpui tih loh khawpui dangah two wheeler taxi permit pek chhuah turin thutlukna siam a ni a; Aizawl khawpui tih loh district khawpui 10 leh Thenzawl khua tan permit 1,792 pek remtih niin, permit-te chu pek chhuah mek a nih thu Transport SPIO-in a tarlang.

SPIO chuan, Permit Terms & Conditions Sl.No. 3-in passenger phur lirthei permit-te hralh, zawrh leh inhman hawhtir a phal lo tih a tarlang a, "Dan bawhchhia an awm a nih chuan permit cancel/suspend thlenga hrem theih a ni," a ti.

Two wheeler taxi permit pek chhuahah hian fee Rs 500 lâk ṭhin a ni a, STA-in permit a phalsak tawhte chu pek chhuah mek zel a nih avangin tun dinhmuna permit pek chhuahna aṭang sorkarin sum a hmuh zat hriat theih a ni lo. Chutihrualin, STA-in khawpui hrang hrang tana two wheeler taxi permit a siam zat 5,256 aṭanga chhûtin, fee aṭanga sum hmuh tur chu Rs 26,28,000 a ni.