January 30, 2024-ah VC/LC by-election

State Election Commi­ssion chuan district paruk, autono­mous district council pahnih leh Aizawl Municipal Corporation hnuaiah village council leh local council by-election neih hun tur nimin khan a puang a; January 30, 2024-ah inthlan a ni dawn.

By-election atan hian nikum lam khan electoral roll tihchhuah a ni tawh a; inthlana chuh tumte tan January 10, 2024 tlai dar 3 thleng hming thehluh theih a ni a, January 30, 2024 zing dar 7 aṭanga tlai dar 4 thleng vote thlak hun hawn a ni ang. Vote thlak zawh veleh vote chhiar nghal tur a ni.

VC by-election neihna turte chu Aizawl district-ah chuan - Chhanchhuahna Khawpui, Darlawn Chhimveng, Darlawn Venghlun, Hmunnghak, Sihphir Venghlun leh Mauchàr-te a ni a, seat khat ṭheuh a ruak. Champhai district-ah Champhai Zion Veng niin, seat khat a ruak a; Serchhip district-ah pawh Serchhip-V (Field Veng) niin, seat khat a ruak.

Kolasib distric-ah VC pali - Kolasib Diakkawn, Khuangpuilam, Rengte­kawn leh Vairengte-III ahte by-election neih tur niin, seat khat ṭheuh a ruak. Mamit district-ah VC paruk - Darlung, Hnahva, Khawhnai, Ṭuahzawl, Bekabekya (Lianbuang), Phuldungsei Zampuiahte seat khat ṭheuh ruakin, by-election neih a ni dawn a; Khawrihnimah seat nga ruakin, inthlan a ni dawn. Khawzawl district-a Lungtan VC-ah seat khat ruakin, by-election neih tur a ni.

MADC-ah chuan Thiahra leh New Saikao-ahte VC seat ruak pakhat atan by-election neih a ni dawn a; CADC-ah chuan Arotinagar, Jarulsury-I leh Vaseitlang-II ahte seat ruak pakhat hnawhkhahna atan inthlan a ni ang.

AMC chhunga Ramhlun South LC seat ruak pasarih leh Dawrpui Vengthar LC seat ruak pakhat hnawhkhahna atan by-election neih tur a ni bawk.