CM-in Union Minister pahnih a kâwm

Chief minister Lalduhoma chuan nimin khan Road Transport & Highways minister Nitin Gadkari chu a chenna inah a hmu a; January 3, Nilaini khan Union External Affairs minister Dr S Jaishankar chu New Delhi-a a pisaah a kâwm bawk.

CM Lalduhoma hian Road Transport & Highways minister Nitin Gadkari hnenah, Mizorama kawngpui hrang hrang Ministry of Road Transport hnuaia thawhah chak zawka hmalak ni se a duh thu a thlen.

Sorkar thuchhuah tarlan danin, Nitin Gadkari chuan, Mizoram kawngpui siamnaah sumah harsatna a awm loh tur thu a sawi rualin, Mizorama kawngpui siamah thil tihkhawtlai (pending) tam tak a awm ṭhin chu a ngaimawh thu a lo hrilh a; Lalduhoma chuan, a kaihhruai sorkar tharin chak takin hma a la dawn a, an hnathawhte lo ngaihven turin a ngen.

Chief Minister hian NHIDCL-in Mizorama kawngpui an siamnaah environment an tihchhiat nasat thu Nitin Gadkari hnenah a thlen a; Union Minister chuan, tun hnuah chuan environment tichhe lo thei ang bera hna thawh an tum tur thu a lo hrilh.

External Affairs minister Dr S Jaishankar nen an inkawmnaah CM Lalduhoma chuan, India leh Myanmar ramri chu British sorkarin a siam a nih thu sawiin, "Keini Mizo hnahthlakte tan chuan barh luih ramri a ni a, unau min ṭhen hrang a, hmasáng ata tawha kan hnam leh kan ram min tidarh a, chuvang chuan he ramri hi kan pawm thei lo. Hnam khat kan nih avangin rorelna pakhat hnuaia awm theih ni se tih hi kan duh dan leh thlir reng a ni," a ti.

Lalduhoma chuan, sorkar laipuiin Myanmar nena ramri hung a tum a nih chuan British sorkarin ramri a siam chu India sorkarin a pawm tihna a nih thu a sawi a, "Mizote ṭhen darhtu ramri hung hi keini chuan ṭha kan ti thei lo a, kan pawm thei dawn lo a ni," tiin a sawi. Dr S Jaishankar te nupa chu Mizorama zin turin a sáwm bawk.

External Affairs minister Dr S Jaishankar chuan CM Lalduhoma chu a lawmpui tak zet thu a lo hrilh a, a kaihhruai sorkar kal zelna turah duhsakna a hlan a ni.

Dr S Jaishankar hi Indian Foreign Service (IFS) a ni a, CM Lalduhoma te nen Indian civil service-ah 1977 batch ve ve niin, training ho ṭhin an ni.

S Jaishankar chuan social media-ah CM Lalduhoma nen an inkawm thu a tarlang a, "Hun thuhmunah sorkar hna kan zawm a, kan training ho ṭhin. MEA leh Mizoram sorkarin inkungkaihna leh thawhhona ṭha zawk kan neih dan turte kan sawi dun a ni," a ti.