Dy Speaker-in department hotute a kâwm

Deputy speaker Lalfamkima, Kolasib bialtu MLA chuan nimin khan Kolasib DC conference hall-ah Kolasib khawpuia sorkar department hotu (head of department)-te a kâwm.

Lalfamkima chuan, ZPM sorkar thar auhla ber chu kalphung thar a nih thu sawiin, "Sorkar thil tum tihlawhtling tur hian Kolasib district tan district chhunga officer-te an ṭha tâwk. Kut hnathawktute an ngai pawimawh tur a ni a, Agriculture department chauh tihhlawhtlin theih a ni lo a, department zawng zawngte kut hnathawktu dâwmkânna kawngah kan tel vek a ni," a ti.

Ramri humhalh an ngaih pawimawh thu sawiin Lalfamkima chuan, "Sorkar pawhin NGO leh political party tin aiawh telna tur a din thuai dawn. Ramria harsatna a awm apianga ei leh bar leh tuialhtheia harsatna kan tâwk ṭhin hian kan la intodelh lohzia a tilang," a ti a, intodelh turin sorkar tharin theihtawpin hma a la dawn tih a sawi.

Deputy Speaker chuan, sorkar hnathawk, a bikin Kolasib-a thawktute zingah dàwr nuam lo tia mipui phunna thâwm hriat tur awm ṭhin chu pawi a tih thu a sawi a, chutiang mite chu insiamṭha a, mipui tana ṭangkai taka thawk turin a sáwm.

Inkawmhonaah hian sorkar department hotute'n project kal lai an neiha an harsatnate leh puih an mamawhnate an sawi a; Deputy Speaker chuan an tan theihtawp chhuah a inhuam thu a sawi a ni.