Lockdown bawhchhia mi 38 man

Covid-19 darh zel tur venna atana August 16, Pathianni zan aṭanga Aizawl Municipal Corporation (AMC) huam chhunga total lockdown puan chuan chhun lamah zawm a hlawh a, zan lamah erawh chhuah luih tum an awm ṭhin. August 17, Thawhṭanni zan khan lockdown bawhchhia mi 38 man an ni.

Police hotute hnen aṭanga Vanglaini thu dawn danin, total lockdown hi tun dinhmunah chuan mipuiin an zâwm ṭha a, chutih rualin, zan lamah chuan phalna nei loa chhuah tum an tam thung. Phalna nei lo pawh emergency thilah chuan chhuahtir zel an ni.

Phalna nei lo, an kalna tur sawi mumal thei lote chu manin, dan anga pawisa chawitir an nih hnuah hawtir leh ṭhin an ni. Tunlai boruakah dan bawhchhiate chu lock-up-ah khung khawm vak a rem loh avangin, lockdown bawhchhiate chu pawisa chawitir an nih hnuah an hawtir ṭhin a ni.