Covid-19 vei enkawl zinga Mi 7 niminah chhuahtir an ni

August 17, Thawhṭanni khan Mizoram hmun hrang hrangah Covid-19 vei mi eng emaw zat hmuh chhuah leh a ni a, nimin khan Vairengte-ah mi 10 chuang hmuh chhuah a ni bawk. Mizorama hripui vei hmuh chhuah tawh, ICMR record-a thun tawh zat chu mi 815 an ni. Hetih lai hian, nimin khan Covid-19 vei dam tawh mi pasarih chhuahtir an ni thung.

Nimina hripui vei dam tawh chhuahtirte chu - State Referral Hospital (SRH) aṭangin mi pathum leh Covid Care Centre (CCC), Tribal Art Centre, Tanhril aṭangin mi pali an ni. SRH aṭanga chhuakte chu civil mi pahnih leh Assam Rifles pakhat an ni a; Tanhril CCC aṭanga chhuakte chu sipai vek an ni.

Indian Council of Medical Research (ICMR) portal-a thun tawh chinah Mizorama Covid-19 vei hmuh chhuah tawh zat chu mi 815 an ni a, chu'ng zinga mi 379 (46.50%) chu chhuahtir tawh niin, la chhuak lo mi 436 (53.50%) an awm. La chhuahtir loh zingah hripui vei tawh lo tih finfiah tawh an awm nual bawk.