Lungleiah hmeichhe naupang khuaikhem

C Lalhmangaiha (58), Lunglei Farm Veng chuan August 15, 2020 zing khan Lungleia hmeichhe naupang kumtling lo a khuaikhem a, Lalhmangaiha hi police-te'n manin, Lunglei District Jail-ah dah luh nghal a ni.

Lunglei police aṭanga thu dawn danin, C Lalhmangaiha hian naupang hi petrol lâknaa kal ve turin a hruai chhuak a, kawng lakah a khuaikhem a ni. Naupang hi ṭap chungin inah a haw a, a ṭah chhan a sawi duh lawk lo a, a hnuah khuaikhem a tawh thu a sawi chhuak a ni. Naupang sawi danin, C Lalhmangaiha hian a hma pawhin a lo khuakhem tawh bawk.

He thil thleng hi police hriattir a nih hnuah Lalhmangaiha chu police-te'n an man a, POCSO Act hnuaiah thubuai an ziak lut a ni. Thil thleng chungchangah hian MHIP Gen. Hqrs. leh Lunglei Farm Veng Branch MHIP chu thuchhuah siamin, Lalhmangaiha chu dan anga na taka hrem an phût.

MHIP Gen. Hqrs. chuan, hmeichhe naupang rilru thianghlim, kumtling lo laka C Lalhmangaiha chet dan chu an dem tak zet thu tarlangin, "Naupang pawisawi lo chunga a chêt duh dan hian kan rilru a ti na hle. Hetiang thil rapthlak hi a thlen tawh loh nan C Lalhmangaiha chungah dan angin hremna sang ber pe turin thuneitute kan phût tlat a ni," an ti.