Home aṭanga tlân chhuakin Covid-19 a vei tih finfiah a ni

Phunchawng OKM Home aṭanga tlân chhuak, khawlai vela khawsa ṭhin mipa pakhatin Covid-19 a vei tih nimin khan hmuh chhuah a ni a, a swab sample endik hma aṭangin quarantine centre-ah a awm tawh thung. He thil thleng vang hian Phunchawng chuan total lockdown an puang a, Rangvamual pawhin a kaichhawn theih awmte an chhui zui nghal.

Phunchawng Branch YMA hruaitute hnen aṭanga Vanglaini thu dawn danin, Covid-19 vei tih hmuh chhuah tâk hi OKM Home-ah awmin, August 10, 2020 khan a tlân chhuak a ni. OKM Home-a awm ṭhin hi a tlan chhuahin hnamdang lirthei en­kawltute bulah a awm ṭhin avang­­in Covid-19 a kai rinhlelh thuah swab sample endik a ni a, hripui a vei tih finfiah a nih thu nimin chhun dar 1 vel khan Phun­chawng khawtlang hruaitute'n an dawng a ni.

Phunchawng Local Task Force chuan nimin chawhnu khan an veng chhungah total lockdown an puang nghal a, Covid-19 veiin a kài chhàwn theih àwmte an chhui zui nghal. Vanglaini palai zawhna chhangin Rangvamual YMA hruaitute chuan, August 11 khan an thu dawn bawhzuiin Covid-19 vei tih hmuh chhuah tak hi  an lo chàn thu an sawi a, "Kut pawha tawk loin kan lo dang a, thuneitute'n an rawn la a, quarantine facilities-ah an dah," an ti. 

Rangvamual YMA hruaitute sawi danin, Covid-19 vei ta hian home aṭanga a tlàn chhuah hnua a tlawhpawh leh a awmna ṭhinte hriat a ni tawh a, chu'ng mite chu thuneitute'n an buaipui zui a ni. Vaivakawn ram china mi thlamah midang pahnih nen an khawsa ṭhin niin a insawi a, nimina Rang­vamual YMA hruaitute'n an va enfiah chuan mi pali an lo awm.