Ballygunge, Kolkata-a Mizoram House Ram hralh tum Mizoram sorkarin a sût

Ballygunge, Kolkata-a Mizoram House ram, kum 2023 aṭanga Mizoram sorkarin hralh a tum chu sût a ni. Ram hralhna tur hian May 2023 khan tender chhuah a ni a, a sûtna thupek hi January 4, Ningani khan GAD-in a tichhuak.

GAD secretary K Lalthawmmawia'n Notification a tihchhuaha a lan danin, 24, Ashutosh Chowdhury Avenue, Ballygunge, Kolkata - 700019-a Mizoram sorkar ram hralhna turin GAD chuan May 2023 khan online kaltlangin tender/auction a chhuah a ni. Tender chhangtu (bidder) zingah Excel Vincom Pvt. Ltd., Kolkata chu thlan a ni a, Mizoram sorkara sum pek ngai (earnest money) pawh an pe vek tawh a ni.

Ballygunge, Kolkata-a Mizoram sorkar ram hralh tum chu GAD-in a ngaihtuah nawn leh tih tarlangin GAD chuan, "A kaihhnawih thil chi hrang hrang ngaihtuah a ni a, mipui nâwlpui rilru leh duh lohna awmte pawh thlir a ni. Chuvangin, GAD chuan mipui nawlpui duh dan thlir chungin ram hralh tumna hi a sût ta a ni," tiin a tarlang.

GAD chuan, ram lei tumtu bidder-te'n sum an pek tawhte chu a pung emaw, zangnadawmna emaw awm loin pêk lêt vek tur a nih thu a tarlang bawk.