ASUTP leh Champhai Master Plan sawiho

Urban Development & Poverty Alleviation (UDPA) minister K Sapdanga kaihhruaiin January 4, Ningani khan UDPA conference hall-ah Champhai Master Plan leh Aizawl Sustainable Urban Transport Project-a hmalakna leh hmachhawpte sawiho a ni. Minister chuan, Champhai Master Plan hnuaiah leilet záwl humhalh chunga hmalak a pawimawh thu a sawi.

UDPA minister K Sapdanga chuan, ram hmasawn leh ṭhang zel atan hmathlir pawimawh neih a pawimawh thu sawiin, "Champhai Master Plan hnuaiah Champhai ti-Champhaitu leilet záwl humhalh chung zela hmalak a pawimawh. Felfai taka ring road bakah hmasawnna ruhrel dang, nakin zela siam theihna tur ruahmanna ṭha tak siam a ni hi a lawmawm hle, " a ti.

Aizawl Sustainable Urban Transport Project (ASUTP) hnuaia project hrang hrangte chu chhawrnahawm tak tur a nih thu leh a ṭul angte zirchianga hmalak theihna tur angte pawh inráwnkhawma sawiho leh tur a nih thu Minister chuan a sawi.

ASUTP hi Asian Development Bank leh Mizoram sorkar ṭangkawp kaltlanga thawh theih a ni a, comprehensive mobility plan (CMP) zawh a ni tawh. Project 60 bawr vel tarlan niin, chu'ng zinga kalpui hmasak ṭulte leh state-in a tum ve tur leh a kalpui theih dan turte sawiho a ni.

AMC huam chin chu sq.km. 129 a ni a, ASUTP hnuaia CMP area chu sq.km. 288 a ni thung. ASUTP huam chhunga inkalpawhna ṭha leh awlsam ruahman chu project thil tum a ni.