Aizawlah random test tih ṭan a ni

August 16, 2020-a Health Minister hoa sorkar hotute ṭhu­khawmin an rêl angin, nimin aṭang khan Aizawlah swab sample random test kalpui ṭan a ni a, mipui zinga vâk zau leh mi chi hrang hrang tawng tamte swab sample lâk a ni.

Thu dawn danin, nimin khan Mission Veng biak-in hnuaiah Aizawl chhim lama veng pali - Mission Veng, Mission Vengthlang, Kulikawn leh Salem Venga mi chi hrang hrang mipui dawr tam zuala ngaih mi 20 ṭheuhte swab sample lâk a ni a; chu'ng mite chu local task force-a che chhuak tam, bus driver, taxi driver, two wheeler taxi driver, muṭia, wholesale dawrkai, chanchin­bumi, traffic police, etc. te an ni.

Mission Veng LTF chuan, mi dawr tam zualte swab sample endik chu rinhlelhawma an awm vang ni loin, mipuiah Covid-19 a lo darh reng tawh em tih finfiah tumna a nih thu an tarlang a; swab test tura sample lakte pawh anmahni remtihna ngeia inpe an ni tih sawiin, "Rinhlelhawma an awm vang a ni lo a, chuvangin, ṭhenawm khawvéngte tan chîâina tur a awm lo a, hlauh tur an ni lo. Fimkhurna kawnga hmalakna pawimawh tak pakhat a ni," an ti.

Vanglaini palai zawhna chhangin Covid-19 chungchanga sorkar thupuangtu Dr Pachuau Lalmalsawma chuan, swab sample random test chu Aizawla hmun hrang hrang bakah, thingtlang lamah pawh tih tum a nih thu a sawi. Dr Pachuau Lalmalsawma chuan, random test chu Aizawla inkhàrkhip chhunga zawh hman tum a nih thu a sawi a, "Aizawla hmun hrang hrangah a tahtawlin kan ti zel dawn a, veng zawng zawngah erawh kan ti vek dawn lo. Covid-19 positive-te awmna veng hnaivai leh hri a darh theihna hmun tura ngaihte ngaih pawimawh a ni ang," a ti.