CM-in British sorkar palai a kâwm

Chief minister Lalduhoma chuan nimin khan Kolkata-a British deputy high commissioner Dr Andrew Flemming chu a pisaah a tlawh a, Mizoram leh Mizo ṭhalaite tana British sorkar leh Mizoram thawh dun theih dan turte an sawi dûn.

Sorkar thuchhuah tarlan danin, CM Lalduhoma chuan, British missionary chungchang leh tuna la damte sawi langin, anmahni vanga Mizote'n hmasawnna nasa tak an hmuh thu leh an lawm thu a sawi a; Mizorama raltlan awmte a theih ang anga British High Commission-in NGO kaltlanga an puih ṭhin avangin lawmthu a sawi.

Dr Andrew Flemming chuan Mizoram CM zingah Lalduhoma chu British High Commissioner pisa tlawh hmasa ber a nih thu sawiin, a kaihhruai sorkar kal zelna turah duhsakna a hlân a, an theihna apiangah an thawhpui dawn thu a sawi. Hun remchang hmasa berah Mizorama rawn zin a tum thu a lo hrilh bawk.

Inkawmnaah hian mau hmanga bio-ethanol siamna tur project ṭan thuai dan tur te, hydro electric power leh kawngpui ṭha nei tura thawhho dan tur te, Britain-a Mizo nurse tam zawk thawn luh dan tur te, Mizo ṭhalai British Army-ah tam zawk an luh theih dan turte an sawi dun a; a ṭul anga bawhzui zel an remti a ni.