Health Minister-in damdawi-in a tlawh kual

Health & Family Welfare minister Lalrinpuii chuan January 4, Ningani khan Civil Hospital Aizawl a tlawh a, nimin khan Mizoram State Cancer Institute (MSCI) leh Regional Institute of Paramedical and Nursing Sciences (RIPANS) a tlawh bawk.

Civil Hospital, Aizawl (CHA) a tlawhnaah Health Minister hi Hospital & Medical Education director Dr Lalmalsawmi Sailo, CHA medical superintendent Dr Zoramthanga leh thawktu dangte'n an lo dawngdawng a, harsatna leh mamawh an neihte an lo thlen.

Lalrinpuii chuan, damdawi-ina thawktute chu mipui tana thawk an nihna hre renga theihtawp chhuah turin a chah a, "Hriselna lama hmasawnna tur leh tihchangtlun ngaite pawh theihtawp chhuaha bawhzui zel tum a ni," tiin, harsatna leh damdawi-in tihchangtlunna tura mamawh an neihte chu theihtawp chhuaha bawhzui a tum thu a sawi.

Health Minister hian CHA complex-a Trauma Centre sak mek a enfiah a, chak zawka hmalak a nih theih nan theihtawp chhuah turin a chah. CHA hotute chuan, internet kaltlanga OPD card lak chhuahna tur siam peih ṭêp a nih tawh thu te, doctor-te'n kal thlâk (kidney transplant) tura thiamna an neih tawh dan leh thawktu, khawl leh khum an neih belh chuan kidney transplant kalpui an inhuam thute an hrilh.

He hunah hian lung (heart) lam enkawlnaah hmasawnna neih theih dan tur hrang hrang sawiho a ni a, thingtlang lama doctor-te tan heart attack chungchang inzirtirna ṭha zawk neih dan turte sawiho a ni bawk.

Health Minister hian nimin khan MSCI leh RIPANS a tlawh a; thawktute'n harsatna leh mamawh an neihte an lo thlen. MSCI-a inzaina khawl leh surgeon awm vek tawh, operation theatre-ah staff nurse leh thawktu dang awm loh vanga a taka kalpui theih loh dante an lo hrilh.

RIPANS Director chuan, Mizorama paramedical college awm chhun RIPANS chu April 2024 aṭangin paramedical hospital anga an kal theih an beisei thu Minister a hrilh. RIPANS-ah hian nursing, medical laboratory science, pharmacy, radio imaging technology leh optometry zirlai 867 an awm mek a ni.

MIZORAM STATE CANCER INSTITUTE

* Kum 2023 chhungin cancer damlo 8,371 an awm a, chu'ng zinga 3,942 chu mipa puitling niin, mi 4,416 chu hmeichhia puitling an ni.

* Cancer damlo zingah mipa naupang 13 an awm.

* Damlo zinga 1,675 chu concomitant chemotherapy la an ni a, mi 5,269-in radical chemotherapy an la.

* Blood transfusion 530 an awm a, BPL chhungkaw zingah damlo 1,548 an awm.