Minister-in inhlan tharna hun a hmanpui

Labour Employment Skill Development & Entrepreneurship leh Sports & Youth Services department chuan nimin khan kum thar atana inhlan tharna hun an hmang a, department pathumte enkawltu minister of state Lalnghinglova Hmar-in a hmanpui.

LESDE conference hall-a inkhawmah Lalnghinglova Hmar chuan, thawktute chu hun vawng dik tur leh hnathawh hun chhunga theihtawp chhuah ṭhin turin a chah a, "LESDE department hi theihna sáng tak nei, department pawimawh tak a ni a, sorkar leh mipui tan ṭangkai zawk leh zau zawka hmalak theih dan ngaihtuahin, mi dang tih dan ṭha zawk a awm chuan entawn hreh lo ang u," a ti.

SYS directorate conference hall-a inhlan tharna inkhawmah Sports Minister chuan, result ṭha neiha medal lâk tam sorkarin a ngai pawimawh ber dawn tih sawiin, "SYS hnuaia wing/branch hrang hrangte inpawh tlang leh lungrual taka thawkho a, inthlahdah loa kan ṭan mar a ngai," a tia, training-na tur hmunhma ṭha tak tak awm sate ṭangkai taka hman a ṭul thu a sawi.

Sports Minister chuan, infiamna kaihhnawih scheme hrang hrangte chu mimal hlâwk nana hman tum lo tur te, hun vawng dika hmang ṭha tur leh chhiatni ṭhatni, kohhran leh khawtlanga inhman dan thlengin chintâwk neih a pawimawh thute a sawi bawk.