Department hmalaknate uluk taka vil zui a ni dawn - Sericuture Minister

Sericulture minister Lalthansanga hoin nimin khan Sericulture directorate conference hall-ah kum thar atana inhlan tharna hun hman a ni a; Minister chuan, department hmalaknate uluk taka vil zui a nih tur thu leh ti ṭha lote chungah a ṭul angin an chungthu rèl a nih dawn thu a sawi.

Lalthansanga chuan, Sericulture department-a thawkte chu thinlung leh tih tak zeta kut hnathawktute thawhpui turin a chah a, "Dikna leh rinawmna nen, ram rorelna khawlah Pathian nena kal dun a ni dawn a, kut hnathawktute chanpual tur ṭanpuinate pawh a dawngtu turte'n chang kim thei se ka duh. Department hmalaknate uluk taka vil a ni dawn a, ti ṭha lote chungah a ṭul angin an chungthu rèl a ni ang," a ti.

Inkhawm hi Seri-culture secretary C Lal-rosanga'n a kaihruai a; director V Zothansanga tarlan danin, Sericulture department-ah thawktu mi 298 an awm mek. Nikum lama Eri project an kalpui chu kut hnathawktu/pangang khawitute'n an hlawkpui hle a, Eri cocoon metric ton 1.8 chuang thar a ni tawh. Cocoon kg khatah cocoon 2,000 - 2,030 a awm thei a, sorkar kum tharah Muga project thar an kalpui leh dawn a ni.

Sericulture Minister hian department-in cocoon an dah khawmte a enpui nghal bawk.