Samagra hmachhawp thlirho a ni

School Education minister Dr Vanlalthlana hoin nimin khan School Education directorate confe­rence hall-ah Samagra Shiksha Annual Work Plan & Budget 2024-25, 2025-26 atana rawtnate thlirho a ni. Minister chuan, sorkar chu huaisen taka a kal dawn thu a sawi.

Dr Vanlalthlana chuan, zirna a pawimawh avangin inthlahdah hman a nih loh thu a sawi a, "Kan ram zirna siamṭhat nan kawng hrang hrangin hmalak a ni dawn a, Transfer & Posting Rules pawh hman theih turin siamṭhat a ni ang a, school provin­­cialisation pawh dan ang taka kalpui a ni ang. Sorkar hi huaisen takin a kal dawn a, thawk­tute nen huaisen taka kan kal chuan kan ram zirna hi kan siam ṭha thei ang tih ka beisei," a ti.

Samagra Shiksha AWPB thlirhonaah hian UDISE hnuhnung berah private school-ah zirlai inziak lut an tlakhniam nasat thu tarlan a ni a; a chhan chu - private school-te'n zirlaite chungchang ziah luhna SDMIS-ah Education department an thawhpui ṭhat tâwk loh vang a nih thu tarlan a ni. Private school-a enrolment tlahniam vangin naupang tam tak tak sikul kal lo anga a lan thu tarlan a ni bawk.