END-in 2023-ah heroin kg. 79.359 man ; A hma kum 3 chhunga man aiin a tam

Excise & Narcotics department (END) chuan kum 2023 chhung khan heroin kg. 79.359 man a, hei hi a hma kum thum kal ta chhunga an man aiin a tam zawk.

Mizoram sorkara END hian kum 2020 khan heroin kg. 11.710 an man a, kum 2021-ah kg. 18.732 leh kum 2022-ah kg. 33.418 an man bawk a; kum thum (2020-2022) chhunga an man zawng zawng chu kg. 63.86 a ni. Kum thum chhunga an man zat ai hian nikum 2023 chhung ringawta an man chu kg. 15.499-in a tam zawk a ni.

END hian kum 2023 chhung khan ruihhlo dang pawh eng emaw zat an man a; methamphetamine kg. 113.222, psedo-ephedrine kg. 5.943, ganja kg. 181.267 leh opium gram 367 an man bakah, zu leh a kaihhnawih chi hrang hrang tam tham tak an man. Zu leh ruihhlo chi hrang hrang an man kaihhnawihah END chuan lirthir 245 leh mihring 7,578 an man bawk.

END chhinchhiah danin, kum 2023 chhung khan Mizoramah ruihhlo leh a kaihhnawih vangin mi 76 an thi a, mipa 64 leh hmeichhia 12 an ni.