KHAWTHLIR

AR-in home tanpui

Assam Rifles chuan Civic Action Programme hnuaiah nimin khan Ferrando Children’s Home, Durtlangah thil chi hrang hrang an pe. AR-in an pekte chu naupangte mamawh tur chi hrang hrang a ni a; infiamna hmanrua, rimawi hmanrua, zirna lama ṭanpuina hmanrua leh thil dangte a ni. Ṭanpuina an pek chhan chu - mipui vantlang leh dinhmun harsa zawka awmte hmasawnna atan a nih thu AR chuan an tarlang.

Viksit Bharat Sankalp Yatra

Lunglei Bazar Veng Recreation Centre leh Rahsi Vengah nimin khan sorkar laipui hmalaknaa mipui hnena sorkar kaipui scheme inzirtirna, Viksit Bharat Sankalp Yatra buatsaih a ni. UDPA leh Health department bakah, bank, Indian Oil Corporation leh BDO aiawhte'n sorkar laipui hmalakna chungchanga thil pawimawhte an sawifiah a, Health department-in inentirna an buatsaih bawk.

Chetsualnaah thi

January 4, 2023 zinga Chite Veng leh Falkland Veng inkara lirtheia chesual Vanlalruatfela (34) s/o R Lalzirliana, Armed Veng chu a hliam tuar loin nimin tlai dar 3:20 khan Ebenezer Medical Center-ah a thi.

KTP inkhawmpui

Ngopa khuain kumina KṬP General Conference a thlen tura thil pawimawhte nimin khan bialtu MLA F Rodingliana, minister hoin sawiho a ni. Minister chuan, "Sorkar ang chuan suma inṭanpuina tun dinhmunah a awm lo a, buhfai, kawlphetha, tui leh inkalpawhna kawngah erawh sorkarin theihtawpin hma a la dawn," a ti. KṬP inkhawmpui lian hi February 29 aṭanga March 3, 2024 chhunga neih tur a ni.

Stadium sak lai en

Sports & Youth Services minister Lalnghinglova Hmar chuan nimin zingah khan Aizawl Smart City Limited sum hmanga Zuangtuia indoor stadium sak mek a tlawh a; "Kan infiamna hmunhmate hi national leh international standard size ang zela siam leh duan a pawimawh a, DPR siam lai aṭangin ngaih pawimawh a ṭul," a ti. Indoor stadium hi badminton khelhna tura buatsaih a ni a, hna 65% vel thawh zawh a ni tawh.