Mizoram leh Assam ramri buai political level-a sawifel kan tum - CM

Chief minister Lalduhoma chuan, Mizoram leh Assam ramri chu political level-a sawifel an tum thu leh January 19, 2024-ah Union Home minister Amit Shah hriatpuinain Assam Chief Minister nen an inbiak dawn thu a sawi.

CM Lalduhoma hi chawlhkar liam ta khan New Delhi-ah prime minister Narendra Modi leh sorkar laipui hotu dangte dawrin a zin a, January 6, Inrinni khan a rawn haw a, thuthar thehdarhtute kâwmin, a zinnaa a thil tihte a puang.

Chief Minister chuan, Home minister Amit Shah nen an inkawmnaah Mizoram leh Assam ramri buai chungchang an sawi dun tih sawiin, "Buaina leh tharum thawhna thleng tawh miah lo se la, hei hi chu political level-ah kan sawifel tur a ni, kan ti," a ti a; ramri buai chinfel ngei an tum thu a sawi.

January 19, 2024-ah Shillong-ah NEC Plenary Session a awm dawn tih sawiin Lalduhoma chuan, "Home Minister-in a rawn kaihruai dawn a, chutah chuan Assam chief minister Himanta nen sawi dun turin kan dah a, Home Minister-in min hriatpui. Buai leh nghaka phí chung loin, kan buai loh lai aṭang hian kan ramri chingfel turin hmalak nghal a ṭha kan ti a, kan tum a ni," a ti.

Lalduhoma chuan, Mizoramah mau hmangin bio-ethanol siam chhuah an tum thu sawiin, "Bio ethanol project din kan tum a, tun aṭanga rei lo têah mau hriak sàwrna din kan tum. MoU draft kan nei tawh a; Mamit district-a mau kan neih hi kum li vel chhung an duh tâwk thei a, ni tin mau tlâwn nuai khat an duh," a ti a, mau kum hniha upain hriak a ngah ber thu leh mautak a ṭhat ber thu a sawi.

Mizoramah paper mill din tum a nih thu sawiin CM Duhoma chuan, "Paper mill rawn din duhte'n min rawn dawr a, Planning zir chian phawt turin kan dah. Kan ram maute a theih ang anga hman ṭangkai kan tum a, mau kan thawn chhuah ruih ruih hi kan titàwp dawn," a ti.

Chief Minister chuan, Myanmar ráltlânte leh India rama ram dang mi awmte biometric identification tih chungchang sawiin, "Foreigner zawng zawng tih tur a ni a, kan hrethiam viau. Mahse, kan unau ráltlânte hian hlauhthawn an nei a, an hlauhthawn hi kan tihreh a ngai kan ti. He thil hi anmahni tih hlauhthâwn nan hman kan tum lo a, Home Minister Amit Shah pawhin 'An ram a rálmuan hma chuan thawn haw kan tum lo,' a ti a, nang pawhin assurance lo han pe rawh, min ti a ni," a ti. Ram dang mite chhinchhiah an nih dawn pawhin, portal hman lai ni lo, portal hran siam tura a ngen thu a sawi.

Lalduhoma chuan, sorkar laipui hotute dàwrnaah hian thil dil a neih loh thu leh, Mizoram tana thil dil chu a zin leh hunah a nih tur thu a sawi bawk.

CHIEF MINISTER THUSAWI DANG ṬHENKHAT

▶ Border fencing siam tum hi an ṭhulh turah ka ngai.

▶ Maintenance of Household Registration Bill tun thlengin President-in assent a la pe lo, President-in assent a pek theih nan hma la turin ka ngen. Bill hi a nih ang anga pawm harsa an ti a, hnûk kîr a, a thara siam turin min duh. An pawm theih loh lai, siamṭhat an duh lai MHA aṭanga rawn hriattir turin ka ngen a, session hmasa berah tih theih kan beisei.

▶ Ráltlân chhawmdawlna official-a tih theih a ni lo. India-in tu mah hi raltlan angin a en thei lo. India ram pumpuiah refugee kan nei ve thiang lo. Mahse, a enkawlnaah theihtawpa thawhho kan tum a, kan resource neih ang ang hman kan tum. Central-in min thlahthlam dawn lo a, manganna tur awmah ka ngai lo.

▶ Road Transport & Highways minister Nitin Gadkari hnenah kawng laihin kan ram leilung a tihchhiat nasatzia ka thlen. Hetiang hi kan sorkarah chuan a thlen kan remti lo a, tun anga an duh ang anga an tâl kan phal dawn tawh lo.

▶ British High Commissioner-ah raltlante ṭanpui ve turin ka ngen, NGO kaltlangin thâ thawh an tum thu min hrilh. An hnen aṭangin ṭanpuina eng emaw zat kan hmuh theih kan beisei.

▶ British-in hydel project min dinpui an hreh lo, kan department-te nen kawng zawn ṭha kan ti. Kawng laihnaah pawh thâ rawn thawh an hreh lo.

▶ Nursing lamah chak zawka hmalak a ṭul a, Britain-ah kan Mizo nurse-te thawh theih dan tur kan sawiho a, min ngaihtuahpui an inhuam. British army-a Mizo ṭhalaite an luh dan tur dap turin thu kan dah.

▶ Sumdawngte nen kan inkâwm a, Mizo entrepreneur zingah toy (naupang inawmtleina) lama kal duh an awm ka ring a, bul ṭan nan toy exhibition rawn buatsaih phawt turin ka hrilh.