Checkgate-ah danin a phût ni lo pawisa khawn hriattirna tur siam
Home Secretary chuan tun hnai khan office memorandum tichhuakin, police checkgate-a danin a phût ni lo pawisa khawn leh pawisa pete hriattirna tur a tarlang.
Home Secretary chuan, police checkgate hrang hrang - Vairengte, Zokhawthar, Kanhmun, Medillichera, Champhai Khankawn, Saiphai, Phaisen, Bairabi leh New Kawnpuia duty-te'n danin a phût bak pawisa an khawn ṭhin tih hriat a nih thu a tarlang a, "Hei hi Mizoram sorkar chuan a pawm thei lo. Hetiang ti ṭhinte chu sim nghal tura hriattir an ni," a ti.
Danin a phût bak pawisa khawn leh pe hmu leh hriate chu sorkar hnena hriattir tura chahin Home Secretary chuan, district tina SP-te chu an huam chhunga checkgate-ah Mizo, English leh Hindi-a report thlenna tur chungchanga inhriattirna tártir vek turin a hriattir a ni.
Dan bawhchhiate thuneitute hnena thlenna tur phone number chu 0389 2336028 leh 7005609849 bakah, email mzhomedeptt@gmail-ahte call, whatsapp, sms leh e-mail hmangin thehluh theih a ni a; dan bawhchhiate report lutte buaipui turin Home department-a under secretary Zahmingthanga ruat a ni.
Home Secretary office memorandum tihchhuah chungchangah hian Home minister K Sapdanga chuan, "Hmun hrang hranga check gate-ah sumdawng lirthei veivâk aṭangin kan police leh civil mi ṭhenkhatin pawisa an lo laksak ṭhin nia an sawi chu tihtawp a nih theih nan ngenna ka siam tawh. Ramria checkgate awmte pawh a theih angin ka tlawh chhuak," a ti.
K Sapdanga chuan, dan baka chêtna rêng rêng a awm tawh lohna turin theihtawp chhuahpui tura mi tin ngenin, "Danin a phût baka pawisa khawn awm ṭhin hi kan rama mipui mamawh phurh luhna man titotu pakhat a ni," a ti a, thil dik lo a nih bakah, mipui tana harsatna siamtu a nih thu a tarlang.
Home Minister tarlan danin, Mizoram sorkar chuan kut hnathawktute thlai thar leh thil siamte hralh chhuah an duh a, chumi atana thil ṭul hmasa chu kawng hrang hranga insumdawn tawnna muanawm leh dik neih a ni.