Ni 40 inkharkhp vangin Mizoram mipui thawhchhuah Vbc. 819.65-a tlakhniam ring
Planning & Programme Implementation department-in a buatsaih, Study on Covid-19 Lockdown and Its Economic Consequences for the State of Mizoram (Policy Response - Recommendation & Advisory)-in a tarlan danin, ni 40 inkhàrkhip vangin Mizoram mipui thawh chhuah 'Gross State Value Added (GSVA)
chu cheng vbc. 819.65 velin a tlakhniam rin a ni.
Study on Covid-19 Lockdown and Its Economic Consequences for the State of Mizoram tarlan dan chuan, ni 21 inkhàrkhip a nihin GSVA chu 3.12%-in a tlahniam tura chhût a ni a, chu chu cheng vbc. 432.37 hû a ni.
Ni 40 inkhàrkhip a nih chuan GSVA chu 4.30%-in a tlahniam ang a, cheng vbc. 819.65 hloh a ni dawn tihna a ni. Inkhàrkhip pawhsei zel a nih a, ni 80 inkhàrkhip a nih chuan GSVA 7.19% a tlahniamin, cheng vbc. 1667.11 hloh a ni ang.
Kum 2019-20 (financial year) chhung khan ni kua inkhàrkhip a ni a, chu vang chuan kum 2019-20 chhunga GSVA ṭhanna tura beisei 9.69% chu a ni pha lo a, 9.51%-ah a tla thla. Kum 2020-21 ah chuan GSVA ṭhanna chu 9.60% ni mah se, inkhàrkhip avangin 8.79% emaw, a aia hniam emaw a nih rin a ni.
Planning department chuan, Covid-19 hripuiin eizawnna lama a khawih nasat tura rin chu sumdawnna - hotel, restaurant, thil siamṭhatna hmun, contruction, thil siam chhuahna, sorkarin a hriatpui loa mimalin eizawnna hrang hrang an neihte leh industry tênau deuhte a nih thu a tarlang a, "Ni 40 inkhàrkhip chhungin GSVA tlemna tur chu 2.35% a nih rin a ni a, June laihâwl thleng pawhsei a nih chuan 3.78% a nih phâk rin a ni," a ti.
Covid-19 chuan khawvel pum socio economic a nghawng tih tarlangin Planning chuan, "Covid-19 hian nunna tam tak a lak bakah buaina belhchhah turin economic activity a tibuai a, ei leh in tur lâk luh leh pek chhuah kawngah harsatna a thlen. Hri léng vang hian mipui nunphung a tlakhniam phah a ni," a ti a; ruahmanna ṭha tak siam a nih loh chuan mipuite'n ni tina an mamawh thil hrang hrang hmuh tur a tlem phah theih thu a tarlang.
Planning department chuan, inpuahchahna mumal tak neih a pawimawh thu tarlangin, "Ruahmanna felfai tak hmangin tuna chhiatna kan tawh mek hi state economic lamah rah ṭha chhuahna atan hman lêt theih a nih a rinawm. Hmasawnna lama tum ram kan thlen theihna atan kan resource mobilization atan thil thar ngaihtuah a pawimawh. State-in theihna a neihahte ngaih pawimawh bika kan dah thiamte a ṭul hle a ni," a ti.
Study on Covid-19 Lockdown and Its Economic Consequences for the State of Mizoram-ah hian sector hrang hranga Mizoramin hma a sawn theihna tura ṭha tura ngaihte tarlan a ni.