Lengpui Airport mi dang hnena hlan thuai kan duh - CM Duhoma

Chief minister Lalduhoma chuan, Lengpui Airport chei ṭhatah ruahmanna (estimate)-a tel, a taka siam tel si loh a awm nual avangin contractor-te siam tur ang ang siam leh tura a hriattir thu leh, airport chu mi dang hnena hlan thuai an duh thu a sawi.

CM Lalduhoma hian January 6, Inrinni tlaia press conference a neihah Lengpui Airport chu mi dang hnena hlan tum a nih thu a sawi a, "Keini ang state rethei tan airport enkawl reng hi thil tih chi a ni lo. Airport Authority of India (AAI) emaw, Adani Group emaw hnenah hlan ni se kan ti a, Adani Group hian DO letter an rawn ziak tawh. Tu hnenah zawk nge pe ila ṭha ang tih kan zir chiang ang. A rang thei ang berin mi dang hnena hlan kan duh a, Civil Aviation Ministry-in an buaipui dawn," a ti.

Chief Minister chuan, Delhi aṭanga January 6, Inrinnia a rawn haw lamah Lengpui Airport a enfiah nghal tih sawiin, "Kamrula ten Airport-ah ramp an siam mek a, sum sên a tam hle. Estimate-ah ramp bang siamna tur a tel a, mahse, a bang siam loin an kalsan a ni," a ti a, ramp bang chu siam leh nghal turin thu a pek thu a sawi.

Airport terminal páwn lama kawng chhâwng chu cheng vbc. 7 chuang hmanga siam a nih thu sawiin Lalduhoma chuan, "Kamrula siam a ni. Terminal-ah a pawhna dopping zone pahnih a awm a, dropping zone hi a chung zâr a ni lo ve ve a, estimate-ah a chung zàr tur a tel a, a chung zar nghal ve ve turin ka hrilh," a ti.

CM Lalduhoma chuan, "Airport baggage area a sir lehlamah chauh an dah a, a sir lehlam lehlama dah turin ka hrilh a, hei pawh hi estimate-ah a tel sa. Contractor-te'n estimate ang takin an siam tur a ni," a ti a; Airport chei ṭhatah aerobridge telh a ni lo chu pawi a tih thu a sawi.

Sorkar laipuia Civil Aviation hotute nen an inkawm chungchang sawiin CM Duhoma chuan, Mizorama helicopter tam zawk service dan tur kan sawiho a, district headquarters tinah helipad aia lian heliport siam dan tur te, hmun 15-ah helipad siam belh dan turte kan sawiho," a ti. Aizawl (Lengpui) thlawhna chuan man to bik chungchangah, "A to bik chhan hi Indigo deuh chauh an thlâwk a, competition a awm loh vang a ni. Air India lak luh dan zawng turin ka ngen," a ti.

Lengpui Airport-ah zanah ṭum theih a la ni lo tih sawiin CM chuan, "Upgrade dawn ila, tih ngai a la tam lutuk, sum kan nei lo. SEDP aṭanga tuamhlâwm mai mai kha a ni a, khati ringawt kha chuan ram ropui kan thleng dawn lo, engti kawng mahin a cute dawn lo. Kan Airport hi international airport ni tura remchang a ni," a ti bawk.