Bawlhhlawh paih man pek loh chuan Jan. 15 aṭangin bawlhhlawh paih tum lo

Aizawl bawlhhlawh paihna lirthei neitu pawl, Aizawl Garbage Vehicle Owner Association (AGVOA) chuan thuchhuah siamin, bawlhhlawh an paihna man (bill) pek an nih loh chuan January 15, 2024 aṭangin an lirtheite an dintir dawn a, bawlhhlawh an paih dawn lo tih an tarlang.

AGVOA chuan, Aizawl khawpuia bawlhhlawh paih lirthei 151-te bawlhhlawh paih man chu October 2023 aṭangin an dawng tawh lo tih an tarlang a, "Motor maintenance, motor oil man, driver leh helper hlawhte pek reng a ngaih avangin kan mangang tawh hle a ni," an ti.

Lirthei tlàntir rih loh mai an duh tih tarlangin AGVOA chuan, "Mipui harsatna tawh tur ngaihtuahin sorkar lama thuneitute ngaihchàn leh phawt ṭha kan ti," an ti a, bill pe tura sorkar nawrna atan January 13 thleng bawlhhlawh paih lirtheiah puan dum an tàr dawn thu an tarlang.

AGVOA tarlan danin, puan dum tàrin awmzia a neih loh chuan January 15, 2024 aṭangin Aizawl khawpuia bawlhhlawh paih lirthei zawng zawng hna thawk loin an ding dawn a ni.

AMC huam chhung veng 83-a bawlhhlawh paih lirtheite chu sorkar (State Transport Authority) pawmpui rate ni lo, rate tláwm tak, per kilometer-a siam pawh ni lo, veng azira bituk (fixed rate) a nih avangin thla khat pawh bill an lak tlai chuan harsatna an tâwk ṭhin tih an tarlang.

Thla thum chhung lirthei hman man an lak tawh loh avangin an buai hle tih tarlangin AGVOA chuan, "Kan harsatna min hriatthiampui a, mipuiin harsatna kan tawh palh theihah pawh min ngaidam turin Aizawl mipui kan ngen a ni," an ti.