KHAWTHLIR

KTP-in thisen pe

January 6, Inrinni khan KṬP, Sihphir Pastor Bial chuan Synod Hospital tan thisen unit 55 an pe a, petute mipa 47 leh hmeichhia pariat an ni. KṬP, Serchhip Chhimveng Branch pawhin Serchhip District Hospital tan thisen unit 20 an pe a, petute mipa 11 leh hmeichhia pakua an ni.

Thawktu aikal late thlifím mek

Chief minister Lalduhoma chuan, sorkar hnathawk aikal late an thlitfim mek thu a sawi. January 6, Inrinnia press conference-ah zawhna chhangin Lalduhoma chuan, "Aikal late dinhmun a lo lut vek tawh a, kan official-te'n department wise-in an thlifim mek. Genuine case a awm ve a, a ṭhen chu cancer-te an ni a, aikal ṭhenkhat chu a thawktu tak tak aiin an efficient (ṭha) zawk. Hriatthiam chin kan nei ang a, a náwlpui erawh chu kan titawp dawn a ni," a ti.

Khàmah chesual

Lalrinawma (17) s/o C Lathansanga, Haulawng chu January 6, Inrinni khan lui an kalnaah a chesual a, a hliam tuar loin a thi. Thu dawn danin, Lalrinawma hi a ṭhiante nen Haulawng rama Keithih lui tui theh kang turin an kal a, Hmáwng léngkîr an tih chung zawla li theh kangna tui pipe a buaipuinaah chesualin, khâmah a tawlh liam a ni. Lalrinawma hi na takin a hliam a, an zawn haw laiin a hliam tuar loin a thi a ni.

MHIP In hawng

Aizawl South-II bialtu MLA Lalchhuanthanga chuan January 6, Inrinni khan a bial chhunga MLA fund hmanga sak ITI Veng MHIP In a hawng. Lalchhuanthanga chuan, "Minister ka nih loh vanga lungawi lo leh rilru dam thei lo in awm tih ka hria a, min duhsaknaah ka lawm em em. Amaherawhchu, minister ka ni lo hi lawm zawk rawh u, minister ka nih chuan ram pum huap a ni a, tunah hian ZPM-in sorkarna kan siam a, ka bial chhung hneh takin ka enkawl theih phah dawn a ni," a ti. MLA hian MHIP In sak nan Rs 4,00,000 a pe a ni.

YMA jubilee lawm

YMA, Lunglawn Branch, Lunglei chuan January 6, Inrinni khan an khaw mualah an kum 50-na, golden jubilee an lawm a, bialtu MLA Lalramliana Papuia'n a hmanpui. MLA chuan, "Veng leh khua changkanna hi in ropui leh hmunhma neih ṭhatah a innghat loa, a chhunga chengte rilru put hmang aṭangin a inṭan zawk," a ti.