HFW Minister-in ZMC leh MCON a tlawh

Health & Family Welfare minister Lalrinpuii chuan January 6, Inrinni khan Zoram Medical College (ZMC) leh Mizoram Nursing College (MCON) a tlawh a; PMJVK scheme hnuaiah sorkarin hriselna lam tihhmasawn ngaih pawimawh a tum thu a sawi.

ZMC hotute nen an inkhawmnaah HFW Minister chuan, PMJVK scheme hnuaiah health sector lam tihhmasawn sorkarin ngaih pawimawh a tum thu sawiin, "Hemi kaltlang hian hriselna lamah hmasawnna nasa tak neih theih a nih ka beisei," a ti a; thawktute hmalakna fakawm a tih thu sawiin, theihtawp chhuah zel turin a fuih.

Adviser to CM (technical) H Ginzalala, MLA pawhin thu sawiin, "ZMC-ah OPD-a inentir an la tlem deuh avangin mipui buaina ber electric vehicle-te service theih dan tur sorkarin a ngaihtuah mek," a ti.

ZMC registrar Dr Jane R Ralte chuan ZMC hlawhtlinna, hmabak leh harsatnate a sawifiah a; ZMC pantu damlo 70% chuangte chu AB-PMJAY scheme hnuaia inziak lut an nih thu leh thingtlang lama mirethei leh khawsak harsa zawkte pan khawm an nih thu te, thawktu an indaih loh nasat thute a sawi.

Mizoram College of Nursing a tlawhnaah MCON hotute'n hmasawnna leh hmachhawp an neihte an lo hrilh a, staff quarters, lirthei leh guest lecturer indaih lohna chungchangte an lo thlen. Health Minister chuan, hostel sak mek chu chak zawka sak a nih theih nan theihtawp chhuahpui a tum thu a sawi a; NAAC ranking ṭha zawk an neih theih nan ṭan la lehzual turin a fuih.

Lalrinpuii chuan, ram danga inhlawh tur tam zawk chher chhuah theihna tura hmalak tlan dan ngaihtuah a ṭul thu a sawi bawk.