Hna chhia a awm ka remti lo - F Rodingliana

Minister of state F Rodingliana chuan January 3-6, 2023 chhung khan a bial, Lengteng constituency-a Saichal, Changzawl, Hliappui, Pàwlráng, Ngopa, Kàwlbêm, Teikhang, Mímbung, Làmzáwl, Hrianghmun, Chiahpui, Khawkãwn leh Khawdungsei khuate a tlawh a; a bial chhungah hna chhia a awm a remtih loh thu a sawi.

F Rodingliana chuan, khawtlang hruaitute'n mamawh leh harsatna an lo thlente chu theihtawpa a bawhzui tur thu a sawi a, "Ka bial chhungah hna chhia a awm ka remti lo a, contractor-te'n sorkar dang anga hlêp an neih tur bituk bâk hlêp neih an beisei tur a ni lo," a ti a; mahni khaw chhunga hna chhuak reng reng uluk taka vil ṭhin turin khaw tina khawtlang mipui a ngen.

Inthlan laiin nasa taka ṭangin an bei tláng tih sawiin Rodingliana chuan, "Tunah chuan inthlan a zo a, party bil leh party rilru dahṭha a, ram leh hnam hmasawnna turin lungrual taka kan thawh tlàn a ngai," a ti a; sorkarin kalphung thar a kalpui tur chu a hlawhtlin theih nan ṭawiawm turin a bial mipui a sawm a ni.