KHAWTHLIR

September 1, 2020 aṭanga Assembly session neih turah, session hun chhung leh programme tur chu vawiin hian speaker Lalrinliana Sailo kaihhruai Business Advisory Committee-in vawiin hian an duang dawn. Tarlan tawh angin, Governor PS Sreedharan Pillai chuan July 21, 2020 khan order tichhuakin, Assembly session hun atan September 1, 2020 a ruat a ni.

Tunlaia Aizawla Covid-19 vei hmuh chhuahte'n an kai chhàwn theihte chhuina kal zelin Synod Hospital a nghawng tel avanga August 17, Thawhṭanni tlai aṭanga tiam chin awm loa Synod Hospital-a inentir leh damlo admit phal loh chu nimin khan sût leh nghal a ni. Synod Hospital Director-in thu a chhuah danin, Covid-19 positive-in an damdawi-ina mi a inhnim hnaih deuh chu a swab sample endik a nih hnuah hripui a kai lo tih finfiah a ni a; hei vang hian vawiin aṭangin OPD leh emergency service a pangngaiin a kal leh dawn a ni.

Lawngtlai East bial­tu MLA H Biakzauva chuan nimin khan an district aṭanga HSSLC Commerce-a Top 10-a lang mi pahnih - Lalrin­tluangi, Lawngtlai-III (pahnihna) leh Lalremruatmawia, Sangau-I (pangana)-te chu DC conference hall-ah chawimawina a hlân. H Biakzaua chuan, zirna chu mihring chher puitling tura hmanraw ṭangkai ber a nih thu a sawi.

Nimin khan State Referral Hospital-ah Covid-19 vei mi pahnih leh rinhlelh thilah mi pathum dah luh an ni. SRH-ah hian hripui vei mi 55 enkawl mek an ni a, ICU-ah pahnih, SICU-ah pahnih leh Isolation Ward-ah 51 an awm. SRH-ZMC Bulletin tarlan danin, ICU-a awmte ngaihtuahawm an ni lo a, SICU-a awmte'n harsatna an nei lo a, ward-a awm zingah hritlang áwm ná nasa vak lo nei panga an awm thung.