KHAWTHLIR
Thisen pe
Mizoram Police din champha lawmna pualin police-te'n thisen an pe chhunzawm zel a, nimin khan Aizawl Civil Hospital tan 1st Bn. MAP-te'n unit 23 leh 3rd Bn. MAP-te'n unit 21 an pe a, a petute mipa vek an ni. Nimin vêk khan Beerseba Group of Institution chuan State Referral Hospital-ah thisen unit 34 pein, a petute mipa 20 leh hmeichhia 14 an ni a; Chhinga Vengthlang Branch KṬP pawhin nimin khan Aizawl Civil Hospital tan thisen unit 31 an pe a, a petute mipa 24 leh hmeichhia pasarih an ni. Ningani khan Thenzawl Bial ṬKP-in Christian Hospital-ah thisen unit 55 an pe bawk.
Kawng khâr dawn
Traffic SP chuan thupek chhuahin, January 19, Pathianni zing dar 9:30 aṭanga tlai 4:30 chhungin Khatla kâwn leh Tennis Court inkar kawngpuiah kawng thawm ṭhat hna (premix carpet leh seal coat) thawh a nih dawn avangin, hna thawh hun chhungin lirthei tlân phal a nih loh thu a puang a; hnathawh tibuai thei tura kawngpui sira lirthei leh bungraw dah khap a nih thu a tarlang bawk.
IPR leh MJA
Nimin khan Mamita Information & Public Relations department-a thawkte leh MJA, Mamit district member-te'n kum 2020 atana inhlan tharna hun an hmang. Inkhawm hi Mamita IPRO Paul Rokima'n a kaihruai a, Mamit MJA nen
thawhhona ṭha tak an neih zel a beisei thu a sawi.
Tectonic plate zirho
Nimin khan Zirtiri Residential Science College-ah India leh Burma tectonic plate chungchang zirhona, 'Tectonic and its implication with special reference to Indo - Burma Range' buatsaih a ni a; India leh Burma tectonic plate insûin chhiatna leh harsatna a thlen theih dan te, chumi laka inrin lâwk theih dan te, sorkarin hma a lak dante zirho a ni.
Hmanrua sem
FOCUS, Mizoram buatsaihin nimin khan New Capital Complex-a FOCUS, PMU Office-ah ran enkawlnaa hmanraw pawimawhte semna hun hman a ni a, Agriculture Development Board vice chairman H Biakzaua, MLA-in a hmanpui. Hmanraw semte hi - portable fridge, vaccine carrier, bag pack, gum boot, pressure cooker, uniform (kawr leh kekawr) leh ran damlote enkawlna (first aid kit)-te a ni a; FOCUS hnuaia thawk veterinary field assistant leh communuity animal health worker-te dawn tura tih a ni.