Covid-19 dona hmatáwnga thawkte Security siamsak turin sorkar phût

Zoram Peoples' Movement (ZPM) party chuan, Covid-19 donaa a hmatáwnga thawk (frontline worker)-te tan ngaihngam taka an awm theihna tur innghahna tlâk (security) ṭha tak siamsak turin sorkar an phût.

ZPM thuchhuah chuan, Covid-19 a darh zau zel a, a hmatáwnga thawkte pawhin an kai tawh a, a darh zel dan tur hriat theih a ni lo tih tarlangin, "Chutih laiin Mizoram sorkarin a frontline-a a dahte zinga a tam ber National Health Mission (NHM) hnuaia contract-a thawktute tan security dah a ni miah lo a, a mak kan ti hle a ni," a ti.

NHM hnuaia thawkte mai ni loin, local/village task force-a thawkte pawh security ṭha tak siamsak turin sorkar an lo phût tawh tih sawiin ZPM chuan, task force duty laia thite pawh Rs. 1,00,000-a a ràl bak, an chhungte tana hnemhnànpui tur ruahmanna siam a ni lo chu pawi an tih thu an sawi.

Covid-19 chu mi tin tan a hlauhawm em em karah doctor, nurse leh technician-te chu an thawk lo thei lo tih sawiin ZPM chuan, ni tin zan tin fimkhur leh hlauthâwng tak chungin an thawk tih an sawi a, "Chuti chung chuan, an tan security siam a ni miah lo hi a mak a, thawktute hmangaihna nei miah loa chhawrah sorkar a ngaih loh theih loh a ni," an ti.

ZPM chuan, NHM hnuaia contract-a thawkte'n medical re-imbursement an tih theih loh avangin an thlabi hlawh chiah ringin nunna thàpin an thawk tih an sawi a, "Vanduaina an tawh palh pawha an inenkawlna tur leh an chhungte baihvai lohna tur khawp tal security siamsak ngei turin Mizoram sorkar kan phût a ni," an ti a; NHM hnuaia thawkte sorkarin a ngaihthah lutuk chu zialo an tih thu an tarlang.