Taxation-in target khûm an inbeisei

Covid-19 léng mah se Taxation department chuan kum 2020-21 chhunga chhiah hmuh tura an ruahman (target) khûm theih an inbeisei. Kum 2020-21 chhunga Taxation department target chu cheng vbc. 600 a ni.

Vanglaini palai zawh­na chhangin Taxa­tion commissioner Kailiana Ralte chuan, April 2020-ah Covid-19 vangin inkhàrkhip khauh taka kalpui a nih avangin chhiah an hmuh tam loh thu a sawi a, "March-ah chuan GST-ah cheng vbc. 47.91 leh thil dang aṭangin nuai 9, a vaiin vbc. 48.81 kan hmu. April-ah chuan industry leh factory-te a chêt mumal theih loh avangin chhiah lut a tam lo. GST aṭangin cheng vbc. 12.48 leh thil dang aṭangin vbc. 1.87, a vaiin cheng vbc. 14.35 kan hmu," a ti.

Taxation Commis­sioner chuan, May thlaah chuan an chhiah hmuh a pangngai leh tawh an beisei thu sawiin, "Tunah chuan sumdawnnate kalpui ṭan a ni leh tawh a, ṭum dang aiin May-ah hi chuan kan hmuh tam kan inbeisei," a ti a; Covid-19 vanga inkharkhip khauh taka kalpui leh a ngaite a nih loh chuan kum 2020-21 chhungin an target khûm theih ngei an inbeisei thu a sawi.

Tuialhtheia chhiah lâk tihsan chuan chhiah lût a tihtam phah dawn tih sawiin Kailiana chuan, "Cheng eng emaw zat kan hmuh belh phah dawn. Inkharkhip vanga Myanmar 

aṭanga thil lo lut thei lo hi kan hlâwkpui hle. Inkhàrkhip hma chuan Myanmar aṭangin dan loin thil a rawn lut a, keini tan chhiah lâk theih a ni lo. Tunah chuan a rawn lut thei lo a, India ram hmun dang aṭanga bungraw lo lut aṭang chuan chhiah kan la zel thei. Myanmar aṭanga a rawn luh loh avang hian India ram hmun dang aṭanga lak luh a tam phah a ni," a ti.

Taxation department hian kum 2019-20 khan an target an khûm a; an target chu cheng vbc. 591 a nih laiin, cheng vbc. 667 an hmu a ni.