HSLC-a Mizo tiṭhate chawimawi

Mizo Zirlai Pawl (MZP) Gen.Hqrs. chuan May 28, Ningani zan khan Ignite Studio-ah HSLC Examination 2020-a top 10-a lang Mizo zirlaite chawimawina leh lawmpuina hun an hmang a; khuallian Higher & Technical Education minister Dr R Lalthangliana'n lawmmante a hlân.

Dr R Lalthangliana chuan, zirlaite'n thiamna belhchian dâwl an neih a pawimawh thu sawiin, "Kan ram hian central service leh all India service kan mamawh em em a, doctor speciality nei kan mamawhna a sang em em bawk. Kan ramin kan mamawhnate hriain ṭhalaite nasa zawka kan ṭan a ngai. Mizo kan nih angin kan thil tihna kawng hrang hrangah a ṭha zawngin kan danglam bik tur a ni," a ti.

MZP hian zirlai ti ṭha ber hnenah Rs. 10,000 hlànin, top 10-a tling dangte hnenah Rs. 5,000 ṭheuh an hlan a; thuchei leh thilpek dangte an hlan vek bawk.

HTE minister Dr R Lalthangliana hian HSLC 2020 top 10-a tling Mizote chu nimin khan a pisaah a kâwm bawk a, lawmpuina Rs. 3,000 leh dictionary a hlan vek a ni.