Kum 9 chhungin táng mi 68 an tlanbo; Tlan chhuak zinga mi 28 man an la ni lo

Kum 2015 aṭanga 2023 thleng khan Mizoramah jail tang tlân chhuak mi 68 an awm a, chu'ng zinga mi 28 chu man an la ni lo. Kum 2023 bikah jail táng tlanbo mi 25 an awm.

RTI Act tlawhchhana zawhna Mizoram Home department hnuaia Prison-in an chhàn danin, kum 2023 khan jail aṭanga tlanbo mi 25 an awm a; chu'ngte chu Central Jail aṭanga tlanbo mi pasarih, Lunglei District Jail aṭangin mi paruk, Siaha District Jail aṭangin mi paruk, Champhai District Jail, Kolasib District Jail leh Lawngtlai District Jail aṭangin mi pakhat ṭheuh leh, Central Women Jail aṭangin mi pathum an ni.

Kum 2015 aṭanga nikum 2023 thleng, kum kua chhung khan Mizoramah jail-a tang tlan chhuak mi 68 an awm a, chu'ng zinga mi 40 chu a hnuah man leh an ni a, mi 28 erawh chu tun thlenga man an la ni lo. Tun thlenga la man lo zingah kum 2015 leh 2016-a tlan chhuak tawhte pawh an tel.

Tun hnai kum kua chhunga jail-a táng tlân chhuak zingah Lalramvela s/o Siamliana, Sihtlangpui chu jail aṭangin vawi hnih a tlân chhuak tawh. March 26, 2016 khan Lunglei District Jail aṭangin a tlân chhuak a, April 2, 2018 khan Central Jail, Aizawl aṭangin a tlânbo leh bawk a; a tlanbo hnuhnung zawk aṭangin kum nga leh thla kua liam tawh mahse tun thlengin man a la ni lo.

Jail aṭanga tlanbo tharlám/hnuhnung berte chu mi pathum, hmeichhia vek an ni a, November 29, 2023 khan Central Women Jail aṭangin an tlân chhuak a, tun thlengin man an la ni lo.

Mizoramah jail 10 a awm mek a, kum 2015-2023 chhungin Serchhip leh Mamit district jail aṭangin tlan chhuak an awm lo a, jail dang zawng aṭangin tlan chhuak an awm.

December 21, 2023 dinhmun angin, Central Women Jail aṭanga tlân chhuakte man an la ni lo vek a, Central Jail aṭanga tlan chhuak mi 17 zinga 13 chu tun thlengin man leh an la ni lo. Champhai District Jail aṭanga tlanbo mi paruk zinga panga chu man an la ni lo a, Lunglei District Jail aṭanga tlan chhuak mi pakua zinga paruk pawh man an la ni lo.

Hetih lai hian, Aizawl, Kolasib leh Lawngtlai district jail aṭanga tlan chhuakte chu man leh vek tawh an ni a; táng tlan chhuak tamna ber Siaha District Jail aṭanga tlan chhuak mi 21 zinga 20 chu man leh tawh an ni bawk.

Táng tlân chhuak la man loh zingah hian December 27, 2022-a Central Jail aṭanga tlân chhuak Lalvenhima (25), Khuangthing pawh a tel a; a chungthu ngaih-tuahtu court-in December 6, 2022-ah hrehawm taka kum 20 táng tura a tih a ni. Thu dawn danin, Lalvenhima hi hmeichhe pakhat nen an inrû a, a nupui rûk chu kum 18 a la tlin lo avangin a lakah pawngsual thubuai ziah luh a ni a, kum 20 táng tura tih a ni. Hei vang hian social media lamah chuan jail aṭanga tlanbo ni mah se, man zui tawh loh duhtu an tam hle a ni.