Covid-19 vei mi 7 niminah chhuahtir Vairengte-ah hripui vei 67 hmu tawh

Thawhṭannia ZMC laboratory-a RT-PCR khawl hmanga swab sample 235 (mipa 169 leh hmeichhia 66) endik zingah Covid-19 vei mi 17 hmuh a ni. Mipa vek niin, Aizawl district-a mi 16 leh Hnahthial district-a mi pakhat an ni a, naupang kum 6 mi pakhat tih loh chu kum 13-46 inkar an ni. Hetih lai hian, tualchhunga contact tracing aṭanga swab test mi eng emaw zat zingah hripui vei hmuh a ni lo.

ZMC-a hmuh chhuah zinga Aizawl district-a mi 16-te zinga pakua chu Mizoram chhunga mi dang aṭanga kai (positive contact) nia hriat a ni a, quarantine facility-a awm lai vek an nih avang­in khung hranna hmun aṭanga kai an nih rin a ni. Mi dang parukte chu Assam Rifles pathum, Assam Regiment pahnih leh BSF pakhat an ni a; khung hran mekte niin, taksaa harsatna nei an awm lo.

Hnahthial aṭanga swab sample dawn 36 an endik zingah hripui vei pakhat, mipa kum 28 mi hmuh chhuah thar a ni a, Assam aṭanga lo lut, khung hran mek a ni.Lunglei Civil Hospital (LCH) laboratory-a TrueNAT-PCR hmanga mi 11-te swab sample endik zingah Covid-19 vei pali, BSF sipai vek hmuh chhuah a ni a; July 24, 2020-a Odisha, Himachal Pradesh, Rajasthan leh Bihar aṭanga lo lut, Saizaikawn Multipurpose Hall-a khung hran mekte niin, harsatna nei an awm lo.

Sorkar thuchhuahin a tarlan danin, Rapid Antigen Test (RAT) hmangin Kolasib district (Vairengte)-a mi 25 endik zingah Covid-19 vei mipa panga, hnam dang driver/handyman vek hmuh chhuah a ni a; kum 18-45 inkar, Assam aṭanga rawn lutte an ni. Hetih lai hian, Thawhṭanni tlai dar 5 leh nimin tlai dar 5 inkar­ah Vairengte checkgate-a RAT hmanga mi 577 endik zingah Covid-19 vei mi 16 hmuh chhuah a ni a, August 17 chhun­ah khan mi pakhat hmuh chhuah a ni bawk.

August 17-18 chhung­a mi 17 hmuh chhuahte hi ICMR portal-ah thun luh a la ni lo a, thun luh tawh chin mi 815 nen Mizorama hripui kai tawh zat chu mi 832 an tling tawha ngaih a ni. Vairengte checkgate-ah hian August 10, 2020 chawhnu aṭanga RAT hmanga Assam lam aṭanga Mizorama lut tur apiang endiknaah nimin tlai dar 5 thleng khan mi 4,055 (hnam dang 3,739 leh Mizo 316)-te swab sample endik a ni tawh a; Co­vid-19 vei mi 67 hmuh chhuah tawh niin, hnam dang driver/handyman 66 leh Mizo pakhat (Excise & Narcotics mi) an ni.