Ni 100 chhunga thawh tura kan duan tam tak kan tihlawhtling tawh - Duhoma

Chief minister Lalduhoma chuan, ZPM kaihhruai sorkarin ni 100 chhunga thawh tura an duan zinga tam tak an tihlawhtling tawh nia sawiin, eptu party-te chu chona thianghlima cho an duh thu a sawi.

ZPM party chuan nimin khan kumin 2024 atan an pisa an hawng a, ZPM president Lalliansawta'n a kaihruai. Chief minister leh ZPM leader Lalduhoma'n thu sawiin, "Ni 100 chhunga thawh tura kan duan tam tak kan tihlawhtling tawh a, a dang pawh tihlawhtling turin theih tawpin hma kan la mek zel a ni," a ti.

Lalduhoma chuan, eptu party-te chona thu sawiin, "Opposition party-te hi chona thianghlima cho kan duh a, kum 5 a ral leh hunah ZPM let thla tur khawpin inbuatsaih rawh se. Tun aṭang chuan eng party mahin an kalphung hlui ang kha chuan min hneh tawh lo ang," a ti a; kum 2024 chu Mizoram tan kum ṭha a nih theih nan an dil thu leh a ram leh a felna an zawn hmasak dawn thu a sawi.

Chief Minister chuan, hna kal lai, loh theih loha chhunzawm ngai a awm thu a sawi rualin, "Cancel ngai erawh eng emaw zat a awm a, he'ng sum chuangbâng hi ba rulh nan kan hmang dawn a ni," a ti.

Sorkar hmasain a lo buaipui ṭan tawh Aizawl Eastern By-pass Road atan sum sanction a ni tawh tih sawiin CM Duhoma chuan, "Sairang leh Seling inkar By-pass Road, NHIDCL-in an khawih tur hi Engineering, Procurement, and Cons­truction (EPC) system hman a ni dawn a, hetiang hi Mizorama a hmasa ber tur a ni hial mai thei," a ti a, double lane tur a nih thu a sawi.

Chief Minister sawi danin, Aizawl By-pass Road siam turah Bawngkawn Brigade aṭanga hmar lam hretah lei verh a ni dawn a, kawng chuan Tuirial pawh thlain, Seling thlen hma Phaibawk kâwnah NH-6 a pawh dawn a ni. Km. 34-a thui a ni dawn a, kawng pangngai aiin km. 22-in a hnai zawk dawn.

Lei verhna atana hman tur bik sum pek theih mai a ni lo tih sawiin Lalduhoma chuan, "Ka dil hnuah Road Transport & Highways minister Nitin Gadkari chuan lei verhna tur bik cheng vbc. 1,313.28 chu min remtihsak a, a chak thei ang bera thawh kan tum dawn a ni," a ti.

CM Lalduhoma chuan, ṭhalaite tan kawng a inhawng dawn tih sawiin, "Eng pawl nge tih leh eng party nge tih lam kan sawi dawn lo. He ram siamṭha tur hian kan zavaiin kan leng vek a, hna kan thawk tlâng dawn a ni," a ti a; mahni kutkawiha eizawn tumte chu sorkarin a puih theih nan company rintlak thawhpui tur zawng turin a chah.

Chief Minister chuan, officer pension tawh, sorkar aṭanga hamṭhatna la an la awm tih an hriat thu sawiin, "Chu'ng mite chu rei lo te chhunga inchingfel turin warning kan pe a, hei hi kan warning tawpna a ni tawh. Mipui chhiah tling khawm, a hman lohna tura hmang an awm chuan corruption a ni a, endiktu leh enthlatu kan ruat a, engkim chiang takin kan hre zel tawh dawn," a ti.

Lalduhoma chuan, Assembly bial 13-ah an duhthlanna leh zalenna hmang thei lo an la awm nia sawiin, "A pawi kan ti a, bial dang 27-te ruala ke an pên ve theihna turin kan dâwm kâng ve zel dawn a, kan thlauhthla dawn lo," a ti bawk.