Retailer tan thla tluanin dawr hawn ṭhin tur a ni

Food, Civil Supplies & Consumer Affairs (FCSCA) Director chuan office order tichhuakin, an department hnuaia fair price shop dealer/retailer-te chu thla tluanin dàwr an hawng ngei ngei tur a ni tih a tarlang.

FCSCA Director chuan, mipuite'n sum leh paia harsatna an neih pawha hun tiam chhung (thla khat chhung)-a an chanpual (quota) an lâk theihna turin thla khat chhung dawr hawn tur a nih thu a tarlang a, "Retailer-te hian Pathianni tiam loin zing lamah dar 6:30-8:30 inkar leh tlai lamah dar 3:30-5:30 inkar dàwr an hawng ngei tur a ni. Hei hi chhûna eibar zawnga kal chhuah ngaite pawhin an eizawnna bahlah loa an chhungkua ration an lâk hman ngei theihna tura ruahman a ni," a ti.

DCSO-te chu an hnuaia retailer-te vil tur leh retailer thupek zâwm lote chu show cause notice (insawifiah tura hriattirna) pe turin FCSCA Director chuan a hriattir a; a ṭul anga hmalak zui zel tur a nih thu a tarlang bawk.