Oil depot siam dan tur sawiho

Food, Civil Supplies & Consumer Affairs minister B Lalchhanzova kaihhruaiin nimin khan a pisaah sorkar hotute'n Mizorama tuialhthei dah khawlna (oil depot) siam dan tur an sawiho.

Ṭhutkhawmah hian Indian Oil Corporation Ltd. (IOC) aiawhte chu sorkar hotute'n Mizorama tuialhthei leh a kaihhnawih thil danga harsatna a awm loh nan leh a tam thei ang ber dah khâwl a nih theih nana hmalak dan tur an sawipui a ni.

IOC aiawhte chuan, Mizoram chu tlang ram a nih avangin railfed oil depot siam a theih loh hmel thu an sawi rualin, ram acre 15-20 a zau a awm theih chuan roadfed oil depot siam ngei an duh thu an sawi.

Sorkar thuchhuah tarlan danin, roadfed oil depot hi hun kal zelah remchang zawngin railfed oil depot-a siam leh tura hmalak theih a nih nan hmun zawn a ṭhat thu sawi a ni a; Mizoram tana storage oil depot siam tum chu ni 30 vel daih tura siam tum a ni.

Ṭhutkhawmah hian FCSCA secretary KT Beicho, Land Revenue & Settlement secretary Zarzosanga, FCSCA director Zodingpuii, LRS director Vanlalthiama, Guwahati-a IOC chief general manager (operations) Nitin Bhatnagar leh deputy general manager (operations) DK Pathak te bakah official dangte an tel.