KHAWTHLIR

HSLC leh HSSLC

Mizoram Board of School Education chuan HSLC leh HSSLC Examination 2024 routine a tichhuak. Kumin February 26 aṭanga March 15 thleng HSLC exam neih a ni dawn a, February 21-23 chhungin practical exam neih a ni ang. HSSLC exam chu February 28 aṭanga March 28 thleng neih a ni dawn a, February 14-ah practical exam neih tur a ni.

Jubilee lawm tur rêl

Champhai District Silver Jubilee Celebration Committee chu nimin khan an chairman James Lalrinchhana, bawrhsap kaihhruaiin DC conference hall-ah an ṭhukhawm a, Champhai district jubilee lawm dan tur an rêl. James Lalrinchhana chuan, kalkhawmte chu an ngaihtuahna séng a, inthlahrung loa an ngaihdante thawh turin a sâwm. Champhai district jubilee chu February 28, 2024-ah DC Office Complex, Keifangtlangah lawm turin an rêl a ni.

MADC CEM leh AR hotu inkâwm

Mara Autonomous District Council (MADC) chief executive member M Laikaw leh Assam Rifles 23 Sector commander Brig. Girish Upadhyay chu nimin khan Siaha Tourist Lodge-ah an inkâwm a, tunlaia Myanmar-a tualchhung indona vanga harsatnate an sawi dun. Myanmar aṭanga sahimna zawnga Siaha district pantute lo kuangkuah a, an harsatnate lo tihfelpui tura thawkho tur te, ruihhlo donaah chak zawka hma laa thawkho tur te, Mara ṭhalaite tam zawka sipaia a an ṭan thei nan a ṭul anga thawkho tur te, Mara-te tan educational tour tam zawka buatsaih turte leh Mara Cultural Festival or Cultural Meet chungchangahte ruahmanna an siam.

Kawng siam dawn

Vaivakawn Zohnuai pènga lei minna lai chu vawiin aṭanga January 20, 2024 thleng chawhma dar 10 aṭangin thawm ṭhat hna thawh ṭhin a ni dawn a; hei vang hian Zohnuai péng aṭanga Ropaiabawk via Vaivakawn thlanmual kawng chu lirthei tlan tlang theih loa khâr a ni dawn. Hna thawhna tur huam chhungah lirthei leh bungrua dah phal a ni lo.