Ballygunge, Kolkata-a Mizoram sorkar ram hralhna cheng vbc. 38 chuang pe kîr tawh

Chief minister Lalduhoma chuan, Ballygunge, Kolkata-a Mizoram sorkar ram chu cheng vbc. 38 chuangin hralh ni tawh mah se, an sût (cancel) a, pawisa pawh an pêk kìr tawh thu a sawi.

CM Lalduhoma hian January 6, 2024-a press conference a neihnaah, Ballygunge-a Mizoram House hmun chu January 5, 2024 khan a tlawh thu sawiin, "Kan sorkar kal ta khan hralh an lo tum a, an hralh fel tawh a, cheng vbc. 38 leh tlem niin ka hria. Mi pakhatin a lei a, a man pawh an dawng diam tawh. Kolkata Mizoram House-a thawkte leh Mizo zawng zawng khuan an ui tlawk tlawk a ni," a ti.

A tira sorkar hotute rilruah chuan Ballygunge-a Mizoram sorkar ram chu hralh a, a manin Salt Lake/New Town lamah hmun dang lei a, in ṭha zawk sak a awm tih sawiin Lalduhoma chuan, "Kha lam pang bawhzuina rêng rêng a awm ta si lo. A hralh ringawtah khan thuneitu sang aṭangin hmanhmawh deuha nawrna a awm a ni," a ti a; ram hralhna man chu tun hnai lawkah dawn a nih thu a sawi.

Lalduhoma chuan, Ballygunge-a Mizoram sorkar ram hralh chungchangah sell deed a la awm lo tih sawiin, "A neitu thar hminga dah a la ni lo. Agreement ka'n en khan clause hnih lai cancel leh theihna sorkarin thuneihna kan lo nei a, legal opinion kan la a, chu'ng hmang chuan kan cancel ta a ni," a ti.

Chief Minister chuan, Ballygunge-ah Mizoram House sak thar tum a nih thu sawiin, "G+3 (chhâwng/floor 4) sak an phal a, a bulahte pawh in sang tak tak a awm a, West Bengal sorkara Housing Minister, Kolkata Mayor ni bawk hnenah chhâwng hnih dang sak belh kan dil dawn," a ti a, a ṭul chuan amah ngei a kal mai dawn thu sawi.

CM Lalduhoma chuan, Delhi-ah Mizote'n peace centre an mamawh avangin, ram lei tur an hmuh theih chuan peace centre lian deuh tak, Mizote'n chhiatni ṭhatnia an hman tur sak an tum dawn thu a sawi. Kolkata-ah pawh Mizote'n cultural centre an mamawh thu sawiin, "Hmun min pe turin West Bengal CM hnenah ka ziak dawn a, ngènngáwl takin cultural centre tur hmun kan dil dawn a ni," a ti.