MNF sorkar hmalaknate ZPM sorkar hnuaiah a rah hmuh theihin a awm - MNF

MNF party chuan thuchhuah siamin, MNF sorkar laia hmalaknate chu ZPM sorkar hnuaiah a rah hmuh theihin a awm chho niin an tarlang a, Aizawl By-pass Tunnel atana notice inviting bid chhuah a ni ta chu lawmawm an tih thu an sawi.

MNF chuan, "Chief minister chhuak ta Pu Zoramthanga'n ngaihtuahna thui tak sénga Aizawl khawpui tâwt lutuk leh inekbeng tlurna hmun tiziaawm tura hun rei tak aṭanga ruahmanna a lo siam tawh Aizawl By-pass Road tia kan hriat lâr, Aizawl By-Pass Tunnel chu ZPM sorkar hnuah BJP sorkarin a lo tipuitling dawn ta hi lawmman kan ti hle," an ti.

Bangladesh, Myanmar leh Manipur-a ráltlânte thlavang hauh kawngah na takin MNF sorkar a kal nia sawiin MNF chuan, "Central lam duh dan pawh palzûtin huai takin hma a la a... hmasawnna kawnga Pu Zoramthanga kaihhruai hmalakna kha eng emaw chen tihkhaihlak a ni," an ti a; ZPM-in sorkarna an chan hnuah MNF hmachhawp lian thamte chu a rah hmuh theihin a awm chho zel dawn niin an tarlang.

MNF chuan, "Ṭawng ûm pha lo tia ZPM-te'n nuihza siam nana Pu Zoramthanga an lo hman nasat ṭhin em em kha tunah chuan an ministry hnuaiah a rah hmuh theihin a lo awm chho ta hi a ṭha thei ang bera kalpui turin Pu Duhoma kaihhruai sorkar kan beisei a, an hnathawh kal zel dante ngun takin kan thlithlai reng dawn a ni," an ti.