Two wheeler-a silencer ri ring chi Traffic police-te'n tihrêm an tum

Aizawl Traffic SP Stephen Lalrinawma chuan hriattirna chhuahin, lirthei siamtu company-in a siam dan ni loa mahni duh dan anga lirthei tihdanglam chu The Motor Vehicles Act, 1988 Section 52-in a khap thu leh, two wheeler-a silencer tihdanglam leh ri ring tak tak vuahte chu tihrêm an tum thu a tarlang.

Traffic SP chuan, lirthei siamtu company-in an vuah sa ni lo silencer vuah ṭhinten mi dang tana hrehawm khawp ri bengchheng a siam bakah, upate leh damlote tan tawrhhlelhawm tak a nih thu a tarlang a, "Aizawl khawpui chhungah, a bik takin two wheeler neitute'n phalna nei loa silencer thlak leh tihdanglam a awm tih hriat a ni," a ti a; two wheeler tan 80 dB(A) aia ring tichhuak thei silencer hman khap a ni a, dan bawhchhiate chu Rs 10,000 thleng chawitir theih an ni tih a tarlang.

Sorkar aṭanga phalna nei loa lirthei tidanglam lo turin Traffic SP chuan mipui a hriattir a; dan bawhchhiaa lirthei tidanglam leh silencer ri ring chi hmang hriate chu lirthei thlalak leh a registration number nen Traffic Control Room phone number 0389-2313061 (call) leh 9366553559 (call/whatsapp)-ahte hriattir turin mipui a ngen bawk.

Traffic SP chuan, sorkar aṭanga phalna la loa lirthei silencer thlâk an mante chu MV Act tlawhchhanin pawisa chawitir zel an nih dawn thu a tarlang a; dan bawhchhiaa silencer ring chi vuahte chu company-in a vuah sa hmanga thlak leh vek turin a hriattir a ni.