State páwn aṭangin rawn haw belh

Karnataka (Bangalore), Gujarat leh Madhya Pradesh-a Covid-19 inkhàrkhip vanga Mizo tangkhang rawn hawte chuan nimin khan rél hmangin Bairabi rél chawlhhmun an rawn thleng a, endik an nih hnuah khung hranna tur qua­rantine facility panpui an ni.

Kawng chhia leh thil dang vangin tum ang hunah tangkhangte hian Bairabi an thleng thei lo a, Bangalore aṭanga rawn hawte chuan nimin zing dar 4:30 khan Bairabi an thleng a, Kolasib DC Dr H Lalthlangliana hoin an lo hmuak. Gujarat leh Madhya Pradesh aṭanga rél pakhata rawn haw hote chuan nimin chhun dar 12:45-ah Bairabi an thleng thung.

Haw tura thuneitute hnena an inhriattir dan ang chuan, Bangalore aṭangin mi 1,452, Gujarat aṭangin 289 leh Madhya Pradesh aṭangin mi 223 rawn haw tura ngaih a ni.

Bangalore aṭanga rawn haw pakhat chuan a awm danah Covid-19 kaia a inrinhleh avangin a chhungte a hrilh a, a chhungte'n sorkar thuneitute an hrilh chhawng ve leh a ni.

Covid-19 kai nia inring­hlel mi pakhatin rél pindan (compartment) pakhata a chuanpui mi 77-te chu Bairabi rél chawlhhmunah endik loin, Aizawl panpui nghal an ni. Covid-19 kai inringhlel hi ZMC-ah hruai a ni a, a bak zawng chu an district ṭheuhah mi dang awm lohna hmunah khung hran an ni ang. Mamit district mi pasarihte pawh an zin veivahna chhui lêt a nih hnuah fimkhur thilah ZMC-ah dah an ni bawk.